Қарасай ауданында әлеуметтік әлсіз топқа жататын 10 отбасы баспаналы болды. Аудан әкімдігінің мәжіліс залында өткен шарада аудан әкімі Жасұлан Естенов қуаныш иелерін құттықтап, пәтер кілттерін иелеріне табыс етті.
Жасұлан Тоққожаұлы өз сөзінде әлеуметтік әлсіз топқа жататын отбасылар үшін «Қарлығаш» тұрғын үй кешенінен барлығы 30 пәтер сатып алынғанын жеткізді. Бұл жолы олардың 10-ы өз иелерін тапты дейтін болсақ, алдағы уақытта тағы 20 отбасы баспанамен қамтамасыз етіледі.
Арнайы бағдарлама бойынша республикалық және жергілікті бюджеттің қаржысына сатып алынған бұл жалдамалы пәтерлер жекеменшікке алу құқығынсыз берілгенін айта кету керек. Бұл жолы жаңа қонысқа I және II топтағы мүгедектер мен ерекше күтімді қажет ететін балалары бар отбасылар кірді.
Иә, бұл күнді олар көптен күтті. Баспаналы болғандар аудан басшысының құттықтауын жылы қабылдап, алғыс білдірді.
Қуат Қайранбаев,
Қарасай ауданы
