Қазіргі таңда Қонаев қаласы мен оған қарасты елдімекендерде 5205 тұтынушы газға қосылған. Қонаев қаласы әкімдігі баспасөз қызметінің хабарлауынша, оның ішінде 4229 пәтер, 746 жеке үй, бірнеше ғимарат бар.
Жалпы шаһардағы нысандардың 33 пайызына табиғи газ тартылған. Бүгінде халықты көгілдір отынмен қамту бойынша жұмыстар жүріп жатыр. Атап айтсақ, биыл Сейфуллин көшесі мен №1, 2, 4, 18, Ивушка шағын аудандарында газ құбырын тарту жұмыстарын аяқтау жоспарланып отыр. Ал №19, 20, Спутник, Арна, Қарлығаш шағын аудандарына газ құбырын жергілікті бюджет есебінен жүргізу көзделуде. Ол үшін жобалау-сметалық құжаты әзірленіп, мемлекеттік сараптамаға жіберілді.
Қонаев қаласы облыс орталығы болғалы құрылыс қарқынды жүріп, халық саны күннен күнге көбейіп келеді. Осыған байланысты қосымша автоматтандырылған газ тарату станциясы мен газ тарату желілерін тарту қажеттілігі туындап отыр. Аталған бағытта да жұмыстар жүргізілмек.
Айта кетерлігі, қаладағы пәтерлер мен жеке тұрғын үйлер көгілдір отынға тиісті мекемеге түскен өтініштерге байланысты қосылады.
