Балқаш аудандық кітапханасында «Ауғанстан: ХХ ғасырдың ерлігі мен қасіреті» тақырыбында Ауған соғысы ардагерлерімен кездесу кеші өтті. Жиналғандар Отан алдындағы азаматтық борышын өтеу барысында ерен ерліктің үлгісін көрсетіп, жат жерде жан тапсырған боздақтарды бір минут үнсіздікпен еске алды.
Балқаш ауданының әкімі Азат Құтпанбетов аталған кеш майдан даласында оқ пен оттың ішінде жүріп, туған жеріне аман-есен оралып, бүгінде ұрпақ тәрбиелеп отырған ардагерлерге құрмет көрсету мақсатында ұйымдастырылғанын атап өтті. Бұдан кейін соғыс ардагерлеріне Кеңес әскерінің Ауғанстан жерінен шығарылғанына 35 жыл толуына орай мерекелік медаль табысталды. Қасіретті жылдардың куәгерлері – аудандық ардагерлер кеңесінің төрағасы Бақыт Сқабаев, Мұқанғали Қожабеков, Мейрамбек Қантбековтер соғыста шейіт болған боздақтардың ерліктерін паш еткен естеліктерімен бөлісті. Кешті ұйымдастырушыларға ризашылығын білдіріп, жүрекжарды алғысын арнады.
Мәдени шара барысында аудан өнерпаздары әннен шашу шашты. Б.Бейсекбаев атындағы мектеп-гимназиясының және аудандық өнер мектебінің оқушылары мен оқытушылары ән-жырдан шашу шашты.
Тағылымға толы кеш соңында жиналғандар аудандық Мәдениет үйінің концерт залында қойылған «Қара майор» кинотуындысын тамашалады.
Бақтығали Дәуітбаев,
Балқаш ауданы
