Наурыз мерекесіне орай Қарасай ауданындағы «Nur-Aman» спорт кешенінде мектеп мұғалімдері арасында қазақ күресінен «Ұстаз барысы» облыстық турнирі өтті. Жарысқа аудандық іріктеу сайысында жеңімпаз атанған 50 балуан-ұстаз қатысты.
Турнирдің ашылу салтанатында қазақ күресі бойынша Алматы облысының аға жаттықтырушысы Жангелді Хамитов сөз алып, қатысушыларға сәттілік тіледі. Балуан-педагогтер 5 салмақ дәрежесінде белдесті. Нәтижесінде, Өтеген батыр ауылындағы №7 орта мектептің дене шынықтыру пәні мұғалімі Зәкен Шыңғыс 60 келі салмақта бас жүлдені иеленіп, Алматы облысының «Ұстаз барысы» атанды.
Шыңғыс Болатұлы 1996 жылы Іле ауданы Өтеген батыр ауылында дүниеге келген. 2003 жылы М.Мақатаев атындағы №13 орта мектептің табалдырығын аттап, 2014 жылы тәмамдаған. 2014-2019 жылдары Алматы қаласындағы Қазақ спорт және туризм академиясында білім алып, 2019 жылдан бері №7 орта мектепте дене шынықтыру пәні мұғалімі болып еңбек етуде.
Шыңғыстың спортқа деген қызығушылығының оянуына әкесі Болат Зәкенұлы әсер еткен. Ол жас кезінде Абай Құнанбайұлының 150 жылдық мерейтойында қазақ күресінен жеңімпаз атанған. Жастайынан спортқа баулыған бапкері – Төлегенді Сұлтанов. Он жасынан спортпен шыныққан Шыңғыс бүгінгі таңда дзюдодан халықаралық жарыстардың жеңімпазы, самбо күресінен жасөспірімдер арасында күміс жүлдегер, Қазақстан чемпионатының бес дүркін жеңімпазы, Азия чемпионатының жүлдегері.
Қазір мектепте мұғалімдік қызметі мен бапкерлікті қатар алып жүр. Маратбек Әмір, Серікбай Ернар, Дамир Маметименов сынды шәкірттері республикалық, халықаралық жарыстарда жеңімпаз атанып, ұстазының мерейін үстем етуде.
Бағдат Шойбас,
Іле ауданы
