Алматы облысының әкім Марат Сұлтанғазиев өңір халқын 1 мамыр – Қазақстан халқының бірлігі күнімен құттықтады.
“Құрметті Алматы облысының жұртшылығы мен барша Қазақстандықтар!
1 мамыр – Қазақстан халқының бірлігі күні.
«Ырыс қайда барасың, ынтымағы жарасқан елге барамын» деген ұлағатты сөзді ту еткен халқымыз, береке-бірлік пен ынтымақтың арқасында талай қиындықты еңсеріп, жеңісті жолмен жүріп келеді.
Достық пен келісім – отанымыздың жарқын болашағының кепілі. Бүгін елімізде 136 ұлт пен ұлыстың өкілдері бір тудың астында тату-тәтті ғұмыр кешіп жатыр. Ұлан – ғайыр Қазақстан шаңырағы астындағы бейбітшілік пен бірлік мәңгі жасасын!
Баршаңызды айтулы мерекемен шын жүректен құттықтаймыз!
Шапағат пен шаттықтың мерекесі елімізге құт, көңілдерге қуаныш сыйласын! Дендеріңізге саулық, отбасыларыңызға ырыс пен ынтымақ тілейміз!
Барлығымыз туған жердің төсінде, құшағын жайған бейбіт елдің ішінде, ел бірлігін сақтауға ат салысайық!” – делінген облыс әкімнің құттықтауында.
