Балқаш аудандық кітапханасында атақты балуан, ел-жұртқа Балуан Шолақ атымен танылған Нұрмағанбет Баймырзаұлының туғанына 160 жыл толуына орай «Әйгілі әнші-композитор, сал-серілер дәстүрін жалғастырушы – Балуан Шолақ» атты облыстық өнер конференциясы өтті.
Сан қырлы дарынымен халқының ризашылығына бөленіп, қазақтың әншілік өнерін өрістетуге зор үлес қосқан заманының айтулы сал-серісі Балуан Шолақтың өмірі мен шығармашылығын насихаттауға арналған шара Дінмұхамед Қонаевтың ескерткішіне гүл шоқтарын қоюдан басталды. Конференцияға арнайы келген қонақтар аудандық тарихи-өлкетану музейіне атбасын бұрып, құнды жәдігерлердің тарихымен танысты.
Облыстық әмбебап кітапхананың жоспарына сәйкес ұйымдастырылған шараға Әл-Фараби атындағы ҚазҰУ-дың ғалымдары – филология ғылымдарының кандидаты, доцент Сағатбек Медеубекұлы мен Молдахан Әбдірайым, журналист-баспагер, PhD докторант Дәрмен Смайыл, облыстық мәдениет, архивтер және құжаттама басқармасының бөлім басшысы Төлеужан Ғұмаров, қазақ күресінен әлем чемпионы, «Қазақстан барысы» республикалық жарысының күміс және қола жүлдегері, «Жетісу бөрісі» турнирінің жеңімпазы Руслан Әбдіразақ, облыстық орталық әмбебап кітапханасы директорының міндетін атқарушы Гуля Әбдікерімова қатысты. Сондайақ өңіріміздегі дәстүрлі әншілер мен мектеп оқушылары тағылымды шараның мәнін арттырды.
Аудандық мәдениет, тілдерді дамыту, дене шынықтыру және спорт бөлімінің басшысы Дәулет Шайбаев мәдени жиынның шымылдығын ашты. ҚР Мәдениет қайраткері Төлеужан Ғұмаров құттықтау сөз сөйледі. Ұлт мақтанышына айналып, халқының сүйіспеншілігіне бөленген ақын, сазгер Балуан Шолақтың өмірі мен шығармашылығынан сыр шертетін бейнефильм көрсетіліп, Әл-Фараби атындағы ҚазҰУ-дың ғалымдары «Балуан Шолақтың Жетісу өңіріне сапары хақында», «Рухы биік Балуан Шолақ», «Ұлттық спорт өнеріндегі Балуан Шолақтың орны» тақырыбында баяндамаларын оқыды. Шара барысында аты аңызға айналған тұлғаның немересі Шайдолла Шолақовпен онлайн-жүздесудің де сәті түсті.
«Бақанас» халық театры өнерпаздарының сомдауымен «Алып күштің дарабозы» атты сахналық қойылым көрсетіліп, дәстүрлі әншілердің орындауында шырқалған Балуан Шолақтың әндері қалың көпшілікті тәнті етті. Шараға орай ұйымдастырылған ауқымды кітап көрмесі таныстырылып, библиографиялық шолу жүргізілді. Балуан Шолаққа арналып жазылған арнау-өлеңдерді М.Сеңгірбаев атындағы орта мектептің оқушылары жатқа, мәнерлеп оқыса, балалар өнер мектебі оркестрінің орындауында күй қалықтады.
Алтынай Сымылтырова,
Балқаш аудандық кітапханасының әдіскері
