Мектепке дейінгі білім беру ұйымдарында жұмыс істеп жүрген педагогтердің жалақысын өсіру бағытында тиісті іс-шаралар пысықталып жатыр. Бұл туралы Оқу-ағарту министрлігінің «Балаларды ерте дамыту институты» РММ директоры Манара Адамоваға сілтеген ҚазАқпарат хабарлады.
Бүгін Орталық коммуникациялар қызметіндегі баспасөз мәслихатында балабақша педагогтерінің орташа жалақысы туралы сұрақ қойылды.
«5 жылға дейінгі еңбек өтілі бар және ең төменгі ІІ санатты балабақша педагогінің орташа айлығына тоқталсақ, шамамен 164-172 мың теңгені құрайды. Сонымен қатар, тәжірибесі жоқ, жұмысқа енді ғана орналасқан жас маманның жалақысы 94-120 мың теңге аралығында болады. Әрине, осы сомадағы жалақы тым аз. Сол себепті мектепке дейінгі ұйым педагогтерінің табысын тағы да кезең-кезеңмен көтеруді қарастырып жатырмыз», – деді Манара Адамова.
Бұл орайда ол 2023 жылдың соңына дейін мектепке дейінгі ұйым педагогтерінің айлығын көтеру мәселесі қарастырылатынын айтты.
Мемлекет басшысы Қасым-Жомарт Тоқаев былтыр қыркүйектегі жолдауында балаларды балабақшамен қамтамасыз ету мәселесін түпкілікті шешуді, тәрбиешілердің әлеуметтік мәртебесін арттырып, жалақысын көбейтуді тапсырған еді.
Ресми мәлімет бойынша, мектепке дейінгі білім беру ұйымдарында 97 408 педагог жұмыс істейді. Оның 41 596-сы (42,7%) ауылды аймақтарда, 55 811-і (57,3%) адам еңбек етеді.
ҚазАқпарат
