Әл-Фараби атындағы Қазақ ұлттық университетінің филология факультетінде А.Байтұрсынұлы атындағы Қазақ тіл білімі кафедрасының ұйымдастыруымен Қазақстанның еңбек сіңірген қайраткері, күйші-домбырашы Шәміл Әбілтаймен «Күй – құдірет» атты кездесу кеші өтті. Шәміл Әбілтайдың 75 жылдық мерейтойына арналған іс-шараны А.Байтұрсынұлы атындағы Қазақ тіл білімі кафедрасының меңгерушісі, филология ғылымдарының докторы (ф.ғ.д), профессор Анар Бекмырзақызы ашып, өнерпаз өмірі туралы сөз қозғады. Кездесу кешінде ф.ғ.д., профессор Берікбай Сағындықұлы сөз сөйлеп, жылы лебізін білдірді.
Күмбірлеген күй өнеріне арналған кездесу барысында студенттер ұлттық өнерді дәріптеп жүрген өнерпазға түрлі сұрақтар қойып, автордың шығарған күйлерінің тарихынан хабардар болды. Кездесу кешінде жиналған студенттер мен оқытушыларға күйші «Тұран», «Ұлт ұстазы – Ахмет», «Ұлт көсемі – Әлихан» деген күйлерін тартып, «Ұлытау», «Аңсау» әндерін орындады. Күйшінің шығармашылығына арналған кеш барысында студенттер де өз өнерлерін көрсетіп, күйшінің батасын алды. Қазақтың ұлттық болмысын тереңнен түсінуге жол ашқан танымдық кездесуде Т.Жүргенов атындағы Қазақ ұлттық өнер академиясының оқытушысы Нұрлан Түменбаев күйшінің туындыларын орындап берді.
Осындай кездесулердің ұлттық құндылыққа негізделген білім беру үдерісінде маңызы зор. Күй құдіретіне терең бойлаған танымдық іс-шаралардың жалғасын табарына сеніміміз мол.
Айнұр Ақкөзова
