Бұл туралы бүгін Астанада Орталық коммуникациялар қызметінде өткен брифингте қорғаныс министрінің орынбасары Дархан Ахмедиев хабарлады.
Биыл көктемгі мерзімді әскери қызметке шақыру президенттің жарлығына сәйкес 1 наурыздан басталады. Осыған байланысты жергілікті атқарушы органдардың шақыру пунктерінде 195 қалалық және аудандық шақыру комиссияларының жұмысы ұйымдастырылды.
Биыл көктемгі шақыруға барлығы 18 мыңнан астам азамат, оның ішінде қарулы күштерге 7 мыңнан астам адам, Ұлттық ұланға 6 мыңнан аса, Ұлттық қауіпсіздік комитетінің шекара қызметіне 3 мыңнан астам, Төтенше жағдайлар министрлігіне 300 адам, Мемлекеттік күзет қызметіне 80-ге тарта адам шақырылады.
Бұған дейін еліміздің қырықтан астам жоғары оқу орындарымен жасалған келісім бойынша әскери борышын өтеген жастар әскерден кейін екі жыл ішінде жоғары оқу орындарына ақысыз, ҰБТ тапсырмай түсе алады.
Қарулы күштер Бас штабының ұйымдастыру-жұмылдыру жұмысы департаментінің басшысы Бауыржан Артықов заңға сәйкес оқып жүрген, некеде тұрған және балалары бар, сырттан көмекке мұқтаж отбасы мүшелерін күтумен айналысатын азаматтар әскерге шақырудан босатылатынын немесе әскери борышын өтеуді кейінге қалдыруға құқығы барын айтты. Кәсіби қызмет атқарып жүрген педагогтар мен дәрігерлер де мұндай жеңілдікті пайдалана алады.
