Кеген ауданы тұрғындарымен кездесуде облыс әкімі Марат Сұлтанғазиев ауданның туристік әлеуеті жоғары екенін және одан ары күшейту керегін айтты. «Аудан Алматы тау кластері аясында еліміздің ТОП-10 басымдықты туристік аймағына кіреді. Экологиялық туризм Кеген ауданының негізгі туристік өнімі саналады, оның дамуы аудан аумағында орналасқан «Көлсай көлдері» ұлттық паркінің әлеуетіне негізделген» деген әкім былтыр «Көлсай көлдері» ұлттық паркіне 210 мыңнан астам турист келгенін, олардан 100 млн теңгеден астам кіріс түскенін жеткізді.
«Көлсай көлдері» мемлекеттік ұлттық табиғи паркін қоса алғанда, жалпы ұзындығы 337 км-ден асатын туристік жолдарды жабдықтау жоспарланып отыр», – деді Марат Сұлтанғазиев.
Өңір басшысының мәліметінше, туристік бағыттарда инфрақұрылымды құру шеңберінде төменгі Көлсай көлінің жағалауында жарықтандырылған пирс, үстелі мен орындықтары бар демалыс орны, жеке орындықтар, фотоаймақ пен шолу алаңы, ақпараттық тақталар, бағыт көрсеткіштері, қоқыс контейнерлері және т.б. орнату көзделіп отыр.
Сонымен қатар ол Саты ауылынан Күрметі ауылына дейінгі аудандық маңызы бар автомобиль жолының (Көлсай көліне кіреберіс) 7 шақырымына күрделі жөндеу жұмыстары аяқталғанын айтты. Құрылысқа 806,4 млн теңге жұмсалды.
«Облыс әкімінің орынбасары Арслан Дәндібаевқа, туризм басқармасы, аудан әкіміне саланың дамуын бақылауға алуды, объектілерді қажетті инфрақұрылыммен қамтамасыз етуді, инвесторлар тарта отырып, бюджетке түсімдерді арттыруды тапсырамын», – деді өңір басшысы.
