Алма облысындағы уланған мектеп оқушылары үйлеріне оралды. Еңбекшіқазақ көпсалалы ауданаралық ауруханасының дәрігерлері ауруханаға жатқызылған балалардың жағдайы жақсарғанын хабарлады.
Еске сала кетейік, 2023 жылдың 19 мамырында сағат 16:00-де жедел жәрдем бригадасы Еңбекшіқазақ көпсалалы ауданаралық ауруханасының қабылдау бөліміне Бәйтерек ауылындағы орта мектептің 5 «Д» сыныбынан астан уланған болуы мүмкін деген күдікпен 10 оқушыны жеткізген болатын. Оқушыларға алдын ала «Бактериялық тағамнан улану, анықталмаған» деген диагноз қойылған. 22 мамырда 10 оқушының барлығы үйлеріне оралды.
«Балалардың денсаулығының жақсаруына байланысты және ата-аналарының өтініші бойынша балалар үйлеріне шығарылып, тұрақты мекен-жайы бойынша амбулаторлық бақылауға алынды», – деді Еңбекшіқазақ ауданы бойынша директордың ана мен баланы қорғау жөніндегі орынбасары Әлия Омарбекова.
