АЛматы облысының басшылығы алдында тұрған басты міндеттердің бірі – елдімекендерге инфрақұрылым тарту, оның ішінде халықты таза ауыз сумен қамтамасыз ету. Бұл туралы облыс басшысы Марат Сұлтанғазиев баспасөз мәслихатында айтты.
«Қазір халықты ауыз сумен қамтудағы көрсеткіш 92,7 пайызды құрап отыр. Биыл 62 жобаны іске асыруға 27,8 млрд. теңге қарастырылған. Жыл соңына қарай сумен қамту деңгейі 93,5 пайызға жетеді», – деді Марат Сұлтанғазиев.
Өңір басшысы сонымен қатар газдандыру мен жол жасау секілді инфрақұрылымдық салалар туралы да сөз етті.
«Бүгінгі таңда газ тарту қажет 294 елдімекеннің 147-сіне газ құбырлары тартылды. Көгілдір отынға облыстың 1 млн 114 мың тұрғыны қосылған. Биыл тағы 9 елдімекен қосылса көрсеткіш 69,4 пайызға жетеді», – деді әкім.
Облыс әкімінің сөзінше, жылдан жылға жол сапасы жақсарып келеді. 2022 жылы барлығы 731 шақырым жол жөнделді. Биыл жол инфрақұрылымын жақсартуға 48,5 млрд. теңге бөлінді. Жыл соңына қарай жақсы және қанағаттанарлық жағдайдағы жол 91 пайызға жетеді деп жоспарланып отыр.
