Абай облысындағы орман өртінде жоғалған 11 адамның мәйіті табылды. Осылайша өрттен қаза тапқандар саны 14 адамға жетті. Бұл туралы Абай облысындағы өртті сөндіру бойынша жедел штаб хабарлады. Төтенше жағдайлар министрлігінің ақпараты бойынша, қаза тапқандардың аты-жөні анықталып жатыр. Бұған дейін үш орманшының мәйіті табылғаны хабарланған.
Қазақстан президенті Қасым-Жомарт Тоқаев Үкіметке Абай облысындағы орман өртін сөндіру және төтенше оқиға ауқымы кеңейіп кетпеу үшін қолда бар техника мен құтқарушыларды жұмылдыруды тапсырған.
Абай облысында орманның өртене бастағанына бірнеше күн болды. Министрліктің алдын ала есептеуінше, өрт аумағы ендігі 60 мың гектардан асады.
Қазіргі уақытта өртті сөндіруге ТЖМ, Орман шаруашылығы комитетінен, жергілікті атқарушы органдардан және Қорғаныс министрлігінен 1000-нан астам адам, шамамен 252 бірлік техника жұмылдырылған. Өртті сөндіруге Алматы қаласы, Алматы, Қарағанды, Жетісу облыстарынан құтқарушылар жөнелтілді.
Бүгін Қазақстан Президенті Қасым-Жомарт Тоқаев төтенше жағдайлар министрі Юрий Ильинді қызметінен босатып, орнына Сырым Шәріпхановты тағайындаған.
