Алматыдағы облыстық көпсалалы клиникалық ауруханасының дәрігерлері сүйек жұтып қойған әйелді аман алып қалды.
Науқас ауруханаға іші ауырып, тамағы жұтындырмай, тынысы тарылып, қиналған күйде түседі. Ол дәрігерлерге төрт күн бұрын тамақ ішіп жатып байқаусызда сүйек жұтып қойғанын айтады.
«Сүйек тамағыма кетіп қалғанда мен дереу өзіміздің аудандық ауруханаға бардым. Олар тексере келе мені амбулаториялық емделуге жіберді. Бірақ тамағымның ауырғаны сол күйі кетпеді. Сосын жеке клиникаға бардым, олар мені облыстық ауруханаға жіберді», – дейді науқас.
Дәрігерлер әйелді медициналық аппаратпен жіті тексеріп, өңештің іш қуысының шырышты қабығында өткір сызықтық жыртылулары пайда болғанын анықтайды.
«Бастапқыда хирургиялық жолмен сүйекті алып тастағымыз келді. Өйткені, шырышты қабық жарылған және сүйектің өңеште қадалып тұрғанына төрт күннен астам уақыт болған. Бірақ, консилиум эндоскопиялық емдеу әдісін жүргізу туралы шешім қабылдады», – дейді клиникалық-диагностикалық бөлімшенің дәрігері Данияр Қожантайұлы.
Дәрігерлер эндоскопиялық әдіспен өңеште тұрып қалған сүйекті алып тастайды. Бұл әдіс хирургиялық пышақты қажет етпегендіктен, жарақаттанған жердің тез жазылуына септігін тигізеді. Қазір науқастың жағдайы қанағаттанарлық деп бағаланып отыр.
Айта кетейік, Алматы көпсалалы клиникалық ауруханасының дәрігерлері диагностика мен емдеудің аз инвазивті эндоскопиялық әдістерін кеңінен қолданады, олар көптеген жағдайларда классикалық жедел хирургия әдістерін тиімді алмастырады.
