Елімізде жыл басынан бері жастардың санасына кері әсер ететін 12 мыңнан астам шетелдік интернет-ресурс бар екені анықталған. Бүгінгі таңда соның ішіндегі 2708 сайт бұғатталды. Бұл туралы Ішкі істер министрлігінде өткен баспасөз мәслихатында Әкімшілік полиция комитетінің ерекше тапсырмалар жөніндегі аға инспекторы Лейла Әліпбаева мәлімдеді.
«Әлеуметтік желілер балалардың моральдық және рухани дамуына теріс әсер ететінін де жоққа шығаруға болмайды. Балалар интернетте пайдалы ақпаратпен қатар, теріс пиғылды мәліметтер бар екенін түсінуі керек. Биыл Ішкі істер министрлігі өз құзыреті шегінде 12 мыңнан астам шетелдік заңсыз интернет-ресурсты анықтады. Ол ресурстар туралы деректер бұғаттау үшін Ақпарат және қоғамдық даму министрлігінің «Кибернадзор» ақпараттық жүйесіне енгізілді. Оның ішінде бүгінде 2 708 сайт бұғатталды», – деді Лейла Әліпбаева.
Интернеттің пайдалы тұстарымен қатар, зиянды жақтары да жоқ емес. Жастардың санасын улап, жолынан адастыратын теріс пиғылды ақпараттар легі әлеуметтік желіде желдей есіп жүр. Министрлік өкілі келтірген жоғарыдағы дерек жаға ұстатады. Санаулы ғана емес, мыңдаған сайт. Сол интернет-ресурстар өрімдей жастардың өмірін бүлдіріп жатыр. Сондықтан балалардың болашағына балта шабатын сайттарды бұғаттап, біржолата көзін құртқан жөн.
