Алматы облысының тумасы 16 жастағы Жібек Құлымбетова Астанада өткен “Ju-Jitsu Youth World Championship Astana 2023” жарысында топ жарып, алтын медаль иеленді. Осылайша, спортшы джиу-джитсудан 8 дүркін әлем чемпионы атанды. Алматы облысы Жастар ресурстық орталығының хабарлауынша, 48 салмақ категориясы бойынша сынға түскен спортшы Өзбекстан, Ресей, Тайланд, БАӘ елдерінен келген қарсыластарын жеңді.
“Джиу-джитсудан әлем чемпионаты елімізде алғаш рет өткізіліп отыр. Өз елімнің алдында өнер көрсету оңай болмады. Қатты қобалжығаным рас. Алтын иеленіп, маған сенген жұртымның үмітін ақтағаныма қуанып отырмын”, – деді жеңістен кейін Жібек Құлымбетова.
Жалпы,халықаралық шараға 42 мемлекеттен 1000-нан аса спортшы қатысты.
Алматы облысына қарасты Іле ауданының тумасы Жібек 9 жасынан бері спортпен кәсіби түрде айналысады. Бүгінде Қазақстанның спорт шебері, Б. Момышұлы атындағы “Намыс” төсбелгісі мен “Дара бала” медалінің иегері. Талай халықаралық додалардың жеңімпазы.
