Бес күннен кейін елімізде ұлттық мереке – Республика күні тойланады. Бұл мейрамның ел тарихындағы орны ерекше. Қазақ елінің ата-бабаларымыз ғасырлар бойы аңсаған Тәуелсіз мемлекет атануының өзі 1990 жылы 25 қазанда жарияланған Егемендік туралы декларациясынан бастау алады. Азаттықтың алғашқы жылдары бұл күн жыл сайын ұлттық мейрам ретінде атап өтілді. Алайда жылдар өте келе ол дәрежесінен айырылып, мемлекеттік мереке деп белгіленетін болды. Ал бұдан он төрт жыл бұрын мерекелер қатарынан мүлде шығып қалды.
Енді міне, өткен жылдан бастап қайта тойлана бастады және қазір ол ұлттық мереке ретінде бүкіл еліміз тойлайтын жалғыз мейрам. Бұл күні Қазақстанның барлық мемлекеттік ұйымдары мен жоғары және орта арнайы оқу орындарында, мектептер мен басқа да мекемелерде осы мерекеге орай әртүрлі іс-шаралар, спорт сайыстары, концерттік бағдарламалар өтеді. Бұл шаралардың ел тұрғындарын, әсіресе жастарды отаншылдық рухында тәрбиелеу тұрғысынан маңызы өте зор. Сондай-ақ, бұл күні әр ауыл, аудан, облыс болсын, жеткен жетістіктерін саралап, алдағы атқарылатын істерін де бір бағамдап алатыны да ақиқат. Осы тұрғыда ерекше көзге түскен еңбек адамдары, кәсіпкерлер, спортшылар, өнер адамдарының есімдері аталып, мемлекеттік және жеке азаматтар тарапынан белгіленген сый-сыяпаттармен марапатталып жатады. Бұл олардың әрқайсысында өзі істеген игі істері үшін мақтаныш сезімдерін оятып, жаңа бастамаларға түрткі болады. Ал қанша қиын десек те қол жеткізіп жатқан жетістіктеріміз аз емес, келешекте бұдан да ұлғаятыны сөзсіз. Оған әсіресе спортшыларымыздың қосар үлесі мол екені ақиқат.
Мен бүкіл халқымызды Республика күні меркесімен құттықтап, әр шаңыраққа береке-бірлік, баянды бақыт тілеймін! Еліміз жан-жақты дамып, Тәуелсіз Қазақстанымыздың әлем елдері арасындағы абырой-беделі арта берсін!
Матан Бекбосынов,
Спорт шебері, Қазақстанға еңбегі сіңген жаттықтырушы,
Талғар ауданының құрметті азаматы
