Осы жылдың қыркүйек айында Қарасай клиникалық көпсалалы орталық аудандық ауруханасына 1941 жылы туған науқас шұғыл түрде жатқызылды. Ол кеуде тұсының ауыратынын, әлсіреп, басы айналатынын және жүрегінің соғу жиілігі 30-дан төмендеп кеткеніне шағымданған. Кардиологтардың тексеруінен кейін оған брадикардия диагнозы қойылды.
«Аудандық ауруханаға ангиографиялық аппарат орнатылды, бұл кардиохирургиялық операциялардағы мүмкіндіктерімізді кеңейтуге мүмкіндік берді. Осы құрылғының көмегімен және пациенттің өмірлік көрсеткіштеріне сәйкес дәрігерлер кеңесі электрлік кардиостимуляторды орнату туралы шешім қабылдады. Мұндай операцияны бірінші рет жасап отырмыз», – деді Қарасай аудандық аурухананың кардиологы Орынбасар Тайманұлы.
Кардиостимулятордың негізгі міндеті – жүрек соғысын қалпына келтіруге көмектесу. Операция бірнеше кезеңді қамтиды: тері кесу, тамырлардың біреуін оқшаулау, рентгендік бақылаумен жүрек камераларына тамыр арқылы бір немесе бірнеше электродтарды енгізу. Электродтың ұшы оң жақ атриумға (немесе оң қарынша) орнатылады, ал орнатылған электродтардың параметрлері сыртқы құрылғы арқылы тексеріледі.
Ота міндетті әлеуметтік медициналық сақтандыру аясында жүргізілді. Бүгінгі күні науқастың жағдайы тұрақтанды, жүрегі минутына 65 рет соғады.
