Бүгінде жалпы өңір халқының 8 пайызының тұмауға қарсы иммунитеті күшейтілген. Бұл туралы Алматы облысының Бас мемлекеттік санитариялық дәрігері Марат Исмаилов баспасөз мәслихатында мәлімдеді.
Жыл сайын аймақта 400 мыңға жуық адам вирустық инфекциялар жұқтырады. Жедел респираторлық вирустық инфекция (ЖРВИ) және тұмау маусымы қазан айынан бастап сәуір айына дейін жалғасады. Желтоқсан мен қаңтар айларында сырқаттану көрсеткіші ең жоғары деңгейге жетеді.
2023-2024 жылдардағы жедел респираторлық вирустық инфекциялар мен тұмаудың эпидемиялық маусымы 28 қыркүйектен басталды. Ресми деректерге сүйенсек, қауіпті кезеңде вирустық инфекциялардың 58 мың фактісі анықталған. Былтырғы маусымда 92645 адам ЖРВИ жұқтырса, биыл ол көрсеткіш 37% төмендеген.
Мамандардың айтуынша, жалпы сырқаттанғандардың 63 пайызы 14 жасқа дейінгі балалар арасында кездесіп отыр. Марат Исмаилов ЖРВИ мен тұмаудың алдын алудың негізгі жолы – екпе қабылдау екенін айтады.
Облыста Балқаш, Ұйғыр аудандары және Қонаев қаласында тұмауға қарсы вакцина салу аяқталды. Қазір 7 ауданда екпе салу жұмыстары жүргізіліп жатыр.
«Бүгінгі таңда тұмауға қарсы вакцина 123 мың адамға салынды. Бұл вакцина алуға болатын тұрғындардың 73 пайызы немесе жалпы халықтың 8 пайызы. Атап айтсақ, медицина қызметкерлерінің 80 пайызы, жүкті әйелдердің 73 пайызы, жабық мекемелердегі балалардың 68 пайызы, диспансерлік есепте тұратын адамдардың 67 пайызы және қарттар үйінде тұратын жандардың 100 пайызы вакцина алды», – дейді Марат Исмаилов брифингте.
Айта кетейік, облыстық денсаулық сақтау басқармасы «Гриппол плюс» вакцинасының 168 500 дозасын сатып алған. Соңғы 11 жылда халықты тұмауға қарсы вакцинациямен қамту 6,4 пайыздан 13,9 пайызға дейін өсті.
