Қазақстан Премьер-министрі Әлихан Смайыловтың қаулысымен Алматы облысының орталығы Қонаев қаласының шекарасы өзгеріске ұшырады. Үкімет «Қазақстан Республикасының әкімшілік-аумақтық құрылымы туралы» Заңының 11-бабының 2-бөліміне сүйеніп шығарған қаулысында Алматы облыстық мәслихатының 2023 жылғы 24 қарашадағы шешімімен және Алматы облысы әкімдігінің сол күні шығарған «Алматы облысының Қонаев қаласының шекарасын өзгерту туралы» қаулысымен келісетіні айтылған.
Аталған құжатта жалпы көлемі 10 962 гектар жерді Іле ауданының Жетіген ауылдық округіне беру қарастырылған. Бұл жердің 2016 гектары – ауылшаруашылық мақсатында пайдаланылатын жер, 526,7 гектары – елдімекен жері, 445 гектары – орман қорына жататын жер, 3174,8 гектары – өнеркәсіп, транспорт, байланыс, қорғаныс, ұлттық қауіпсіздік, ғарыш қызметіне қажет және басқа да ауылшаруашылық емес мақсаттарда пайдаланылатын жер болып саналады. Сонымен қатар 50 гектары – ерекше қорғаудағы табиғи аймақ, сауықтыру, рекреация және тарихи-мәдени маңызы бар жер болса, 3846,5 гектары – запастағы жер.
Бұған дейін Жетіген ауылы облыстық маңызы бар қала мәртебесін иеленіп, Алатау деп аталатыны туралы хабарланған. «Ашық нормативтік-құқықтық актілер» порталында Қазақстан Президентінің «Алматы облысының әкімшілік-аумақтық құрылымын өзгерту туралы» жарлығы жарияланған.
