Қарасай ауданы Қаскелең қаласының әкімі Асқар Мұқашевке ескерту берілді. Бұл туралы AMANAT партиясы аудандық партиялық бақылау комиссисының отырысында айтылды.
Қарасай ауданының орталығы қыркүйектен бері қоқыстан тазартылмаған. Ал мұнда 80 мың халық тұрады.
«Қаскелеңде қоқыс шығарылмағалы бірнеше айдың жүзі болды. Контейнерлердің барлығы лық толып тұр. Оның иісі танауды жарады. Көшелерде қолданылған дәретхана қағазы, полиэтилен пакет сияқты қоқыс ұшып жүр. Қалғанын ит-мысықтар шашып кететінін көріп жүрміз», – дейді аудандық депутат Василий Тен.
Депутаттың бұл пікірімен жергілікті тұрғындар да келісіп отыр.
«Әр аула үлкен қоқыс үйіндісіне айналған. Әркім қоқысын кез келген бұрышқа төгіп кететінді шығарған», – дейді есімін жасыруды сұраған тұрғын.
Қаскелең қаласының әкімі болса конкурс арқылы таңдалған серіктестіктің жұмыс істеуден бас тартқанын айтты.
«Тендерді «Тазалық» ЖШС ұтып алды. Бірақ, компания басшылығы жұмыс көлемінің көп екенін айтып, коммуналдық қызмет көрсетуден бас тартты. Қазір біз басқа компанияларды қаланың тазалығын ретке келтіруге тартып жатырмыз», – деді қала әкімі Асқар Мұқашев.
Аудандық партиялық бақылау комиссиясының төрағасы Бекжан Сүнбеков серіктестікке ешқандай талап қоя алмағаны үшін әрі қоғамдық резонанс туғаны үшін қала әкіміне ескерту берді.
