Мәжіліс депутаты, «AMANAT» фракциясының мүшесі Максим Рожин Алматы облысындағы әскери бөлімдерге жасаған мониторинг барысында осындай пікір білдірді.
Депутат әскерилендірілген нысанның жұмысымен танысып, оның материалдық-техникалық базасын тексерді. Алайда әскери қызметшілердің еңбекақы мәселесі мәжілісменді таң қалдырды.
Бүгінде бөлім құрамының айлығы шамамен 120 мың теңгені құрайды. Депутаттың айтуынша, бұл сомаға отбасын асырау мүмкін емес.
«Төтенше жағдайлар саласында басты мәселелердің бірі – ол жауынгерлердің қауіпсіздігі. Олардың қолданатын мүлкі. Техникамен қамтамасыз ету мәселесін біз бүгін көрдік. Екінші мәселе – әрине, бұл азаматтардың айлығы. Бұлардың жұмысы өміріне қауіпті екені белгілі. Сондықтан біздің азаматтарға төлеп жатқан жалақымыз да сол қауіпке сай болуы керек деп ойлаймын», – деді Максим Рожин.
Бұл мәселе қазір Парламент деңгейінде көтеріліп жатыр. Депутаттар оны «Азаматтық қорғаныс туралы» заң жобасына енгізуге ниетті. Онда әскери қызметшілерді әлеуметтік-техникалық қамтамасыз ету туралы сұрақтар да ескерілетін болады. Заң жобасы мақұлданған жағдайда жыл ортасына қарай жұмысын бастайды. Айта кету керек, парламент депутаттары жұмыс сапарымен еліміздің түкпір-түкпірінде түрлі нысандарға барады.
