Әйелдер арасында ең көп таралған онкологиялық аурулардың бірі – жатыр мойны ісігі жасарып келеді. Бұл туралы Алматы аймақтық көпсалалы клиника директоры Саяхат Олжаев өңірлік коммуникациялар қызметінің ақпараттық алаңында айтты.
Маманның сөзінше, жатыр мойны ісігіне көбінесе 45-50 жастағы әйелдер шалдығатын. Ал қазіргі таңда бұл дерт 15-20 жастағы қыздарда да пайда бола бастаған.
Аталған ісіктің жасару себептерін Саяхат Олжаев жіктеп айтып өтті. Мысалы, жыныстық өмірдің ерте басталуы мен серіктестердің жиі өзгеруі, ерте жүктілік пен имунндық тапшылық.
Сонымен қатар, баспасөз-мәслихатында статистикалық көрсеткіштер айтылды. Алматы облысы бойынша қатерлі ісік ауруымен 10897 науқас тіркелген. Ал, 1083 науқас жатыр мойны ісігі бойынша есепте тұр. Былтыр 122 әйел ісікке шалдыққан.
Саяхат Олжаев, жатыр мойны обырын ерте анықтау үшін әрбір әйел тіркелген жері бойынша емханада скринингтен өтуі тиіс. Ал жалпы, қатерлі ісіктің алдын алу үшін оны қоздыратын папиллома вирусына қарсы вакцина егуге кеңес беріледі. Көбінесе бұл вакцинаны жыныстық қатынасқа түспей тұрып салдырған абзал.
«Вакцина 10 жас пен 45 жас аралығындағы қыз-келіншектерге егіледі. Егер екпе бойжеткен тұрмыс құрып, алғашқы жыныстық қатынасқа түскенге дейін жасалса, ісіктің алдын алу мүмкіндігі артады. Қыз-келіншектерге денсаулықтарына жауапкершілікпен қарап, тиісті тексерістен уақытылы өтіп тұруға кенес береміз», – дейді Саяхат Таурбекұлы.
Былтыр өңірде 59488 әйел тексеруден өтеді деп жоспарланып, оның 54119-ы скринингтен өтті. Тексеріс нәтижесінде 2800 қатерлі ісік анықталған. Биыл 67231 әйел скринингтен өтеді деп жоспарланып отыр.
Еске салайық, облыс тұрғындары үшін Алматы қаласында жатыр мойны обырына қарсы ашық есік күні өткізіледі. Ол туралы толық ақпаратты Алматы облысы денсаулық сақтау басқармасының сайтынан немесе almoblzdrav инстаграм парақшасынан білуге болады.
