Парламент Мәжілісінің қарауына «Кейбір заңнамалық актілерге әйелдердің құқықтары мен балалардың қауіпсіздігін қамтамасыз ету мәселелері бойынша өзгерістер мен толықтырулар енгізу туралы» заң жобасы мен ілеспе құжат түсті. Алдағы уақытта депутаттар осы құжат жобасын талқылайды.
«Бұл заң жобалары Мәжіліс депутаттарының бастамасымен әзірленді. Жоба Мемлекет басшысының отбасындағы зорлық-зомбылық үшін жауапкершілікті қатаңдату тапсырмасына толығымен сәйкес келеді. Заң жобасында тиісті негізгі нормаларды ұсынып отырмыз. Біріншіден, ұрып-соғуды және денсаулыққа жеңіл зиян келтіруді қазіргі әкімшілік жауапкершіліктен қылмыстық жауапкершілікке өзгерту және жазасын әлдеқайда қатаңдату ескерілген. Екіншіден, жәбірленушінің өтінішін күтпей-ақ зорлық-зомбылық туралы БАҚ немесе онлайн платформалардағы ақпарат негізінде тиісті шараларды қабылдау құқығын беру қарастырылған», – деді депутат Асхат Аймағамбетов Мәжілістің жалпы отырысында.
Оның айтуынша, отбасында зорлық-зомбылық жасаған адамдардың агрессивті мінез-құлқын түзеу үшін сотқа психологиялық көмек көрсетуді міндеттеу уәкілеттілігін беру ұсынылып отыр.
«Сонымен қатар, педофилдерді өмір бойы бас бостандығынан айыру туралы арнайы норма бар. Суицидты насихаттағаны немесе оған итермелегені үшін қылмыстық жауапкершілік енгізу ескерілген. Бұған қоса, балаларға арналған интернаттық ұйымдарды алдын-ала ескертпей-ақ, кез келген уақытта тексеру және басқа да маңызды нормалар ұсынылды. Аталған заң жобасы бойынша Мәжілістің әлеуметтік-мәдени даму комитеті қорытынды әзірлеуге дайын», – деді Мәжіліс депутаты.
