Талғар қаласындағы Мәдениет үйінде Respublica партиясы және Алматы облыстық мәслихатының депутаты, кәсіпкер Гүлжан Түсібиянованың ұйымдастыруымен 1 маусым – Халықаралық балаларды қорғау күніне арналған мерекелік шара өтті. Аудан, қала мектептерінен жиналған 400 бастауыш сынып оқушылары мен олардың ата-аналары өнер мектептерінің кішкентай қатысушылары мен цирк артистерінің концертін тамашалап, қыран-топан күлкіге батты.
Шара басында Respublica партиясы Алматы облыстық филиалының төрағасы Жарас Ниязбек және облыстық мәслихат депутаты, кәсіпкер Гүлжан Түсібиянова сөз алып, аудандағы ең үлкен мәдениет ошағын лық толтырған бүлдіршіндер мен олардың ата-аналарын аталмыш мерекемен құттықтап, жылы лебіздерін жеткізді.
– Бүкіл мерекелердің ішінде өз басым осы 1 маусым – Балалар қорғау күнін ерекше жақсы көремін. Себебі балалардың титтей бір нәрседен қуанғанын, шаттанғанын, риясыз күлгенін көргенде өзіміз де солармен бірге қуанышқа, бақытқа бөленеміз, көңіліміз толып марқаямыз. Бәріміздің үйімізде баламыз бар. Біз де сіздер сияқты бала болғанбыз, біз де балмұздақ жегенді, қызықты концерт көргенді, қыдырғанды жақсы көрдік. Ал халқымызда балалы үй – базар, бала – өмірдің сәні деген керемет тұжырымдар бар. Балалар – біздің болашағымыз. Сондықтан да Балаларды қорғау күні ерекше мереке. Сіздерді осы мерекемен шын жүректен құттықтаймын! Еліміз аман, болашақтарыңыз жарқын болсын! Келешегіміздің кемел болуы сіздердің – бүгінгі бүлдіршіндердің, бүгінгі балалардың жақсы тәрбие алуы, жақсы білім алуына байланысты. Сол себепті алдыңғы буын – үлкен ағаларымыз, әпкелеріміз сіздерге өнегелі тәрбие, озық білім беруге ерекше назар аударуы керек. Біз сіздерді жақсы көреміз, мерекелеріңіз құтты болсын! – деді еліміздегі ең жас партияның облыстағы жетекшісі.
Одан соң аудан көлемінде DamuBala бағдарламасы бойынша бірнеше өнер мектептері мен үйірмелер ашып, балалардың жастайынан өнерлі болуына, жан-жақты дамуына бағытталған игі істердің ұйытқысы болып жүрген кәсіпкер, облыстық мәслихат депутаты Гүлжан Түсібиянова іс-шара қатысушыларын мерекемен құттықтап, ізгі тілегін білдірді.
Мерекелік шараның ең негізгі және қызықты бөлігі – цирк өнерпаздарының концерті болды. Ерекше жанрды еркін меңгерген және балалардың бір сәтке де назарын басқа жаққа аудармай, сахнадағы үдерісті көз алмай қарап отыруы үшін олардың өздерін де әртүрлі сұрақтар қою арқылы үнемі қатыстырып отырған өнер иелерінің шеберлігіне балалар да, оларды ертіп келген ата-аналары мен аға-әпкелері де әбден риза болды.
Шараны ұйымдастырушылар бала десе балмұздақ еске түсетінін де ұмытпапты. Respublica партиясы Алматы облыстық филиалы төрағасының орынбасары Бақтияр Қабасов осы саяси ұйым атынан балаларға 400 балмұздақ таратты. Осылай тегін қызықты концерт көріп, тәттілігі тіл үйіретін тегін балмұздақ жеген бүлдіршіндер жүздері бал-бұл жанып, шын мәнінде бақытқа бөленіп, шат-шадыман қуаныш пен күлкіге кенелді. Осындай сәтті өз көзіңмен көріп, бүкіл өн бойың, жүрегіңмен сезінгенде бақыт деген – балалардың күлкісі екенін анық мойындайды екенсің. Өз басым осындай күй кештім!
Құтмағамбет Қонысбай,
Талғар ауданы
