Ұйғыр ауданындағы Илья Молутов атындағы №3 орта мектебі республикадағы үздік олимпиадалық мектептер қатарына қосылды.
2023-2024 оқу жылындағы жалпы білім беретін пәндер бойынша оқушылардың республикалық олимпиадасының қорытынды кезеңін нәтижелеу үшін еліміздің 100 үздік олимпиадалық мектептер рейтингі жасалған болатын. «Дарын» республикалық ғылыми-практикалық орталығының мәліметінше, үздік атану үшін 590 мектеп бақ сынасты. Жалпы білім беретін пәндер бойынша республикалық олимпиаданың қорытынды кезеңіне 1636 оқушы қатысты.
Рейтинг арнайы формула бойынша шығарылды. Республикалық олимпиадада алтын медаль алған әр баланың жетістігі 3 балға, күміс – 2 балға және қола – 1 балға бағаланды. Олимпиада қорытындысы бойынша, бірінші орынды 6 мектеп, екінші орынды 6 мектеп және үшінші орынды 23 мектеп иеленді.
Осы оқу жылында Илья Молутов атындағы №3 орта мектебінің оқушысы Дилинур Юрикова қазақ тілінен республикалық олимпиадада бірінші дәрежелі дипломға ие болған. Аталмыш мектептің қазақ тілі мен әдебиеті пәні мұғалімі Майра Зиналова шәкірт бойынан пәнге деген сүйіспеншілікті аңғарып, оны білім жарысына қосқан. Нәтижесінде Дилинур дара шығып, мектебін еліміздегі үздік білім ордаларының қатарына қосты.
Ұстаз жақсы шәкіртімен мақтанады, жеңісті күндерімен шаттанады. Ал шәкірті мектебінің абыройын асқақтатып, білім алған ұясын құрметке бөлейді. Ендеше, білімді шәкірттеріміз бен білікті ұстаздарымыз көбейе берсін демекпіз!
Анар Дүйсенбайқызы,
Ұйғыр ауданы
