Алматы облысында тағы да жантүршігерлік жол апаты болып, төрт адам қаза тапты. Қайғылы оқиға 12 маусымға қараған түні Алматы-Шелек-Қорғас күре жолының 105-шақырымында болды.
Алматы облыстық Полиция департаментінің басшысы Бауыржан Әленовтің мәліметінше, Toyota Hiace микроавтобусының жүргізушісі рөлге ие бола алмай, көлік аударылып кеткен. Салдарынан көліктегі төрт жолаушы оқиға орнында көз жұмған.
Жүргізуші мен тағы екі жолаушы -10 және 12 жастағы екі бала түрлі жарақат алып, Шелек ауылындағы ауруханаға жеткізілген. Оқиға бойынша қылмыстық іс қозғалды.
Осыдан бірер күн бұрын, 9 маусым күні кешке Алматы-Өскемен күре жолының 55-шақырымында жеңіл көлік жолдан шығып кетіп, жол жиегіндегі ағашқа соғылған. Апат салдарынан көліктегі бес адам оқиға орнында мерт болып, 12 жастағы жеткіншек жараланып ауруханаға түскен.
