Кеген өңіріне табан тіреген әрбір азамат аспантаумен астасқан мақтадай бұйра бұлттарын көргенде ерекше әсерге бөленеді. Қайқыдан аса бергеніңізде, ұзақ жол жүріп шаршағаныңызды сап басатын салқын ауасы көңіл күйіңізді көкке көтереді. Еңісінен еңкейіп, өрісінен өрлей түскеніңізде айналаны қоршаған қарағайлы тауы мен масаты кілемдей жасыл желегі өзіме кел дегендей құшағын жая түседі.
Осынау сұлу өлкенің ожданды азаматтары бірігіп, аудан экономикасы мен мәдениетінің дамуына өз үлестерін қосып жатқанына қуанасың. Солардың бірі – Зәуреш Нұрғалиқызы. Кәсіпкер Кегенге кіреберістегі өзен жағалауынан бір гектар жер тілімін алып, «SEM-BEK – ETNO AUYL» атты демалыс орнын ашты. Қаз-қатар ақ боз үйлер тігіліп, ауылдың көркін кіргізді.
Демалыс орнының ашылу салтанатына Кеген ауданының әкімі Нұрбақыт Теңізбаев ортақтасты. Ауыл ақсақалы Лехан Тастанов ақ батасын берді. Кәсіпкер Зәуреш Нұрғалиқызының айтуынша, бұл жерде балалардың демалуы үшін ойын алаңы, алтыбақан орнатылып, гүлзарлар мен шыршалар отырғызылады. Өзен жағалауынан ауыл халқының жайлы демалуына көл жасалып, балық шаруашылығы ұйымдастырылады. Жастар жұмыспен қамтылады.
Ауданға қарасты көрікті Көлсай мен Қайыңды, Шарын шатқалы, шығысынан орын тепкен Құмтекей көздің жауын алса, Ақтасты петроглифтері мен Үйсін қорғандары тарихтан сыр шертіп тұр. Киелі мекенде ашылған этно ауылға біз де құтты болсын айтып, қолға алған игі істері ілгерілей берсін деген тілегімізді білдірдік.
Нұрболат Тастанқұлов,
Кеген ауданы
