Алматы облысы, Іле ауданы, Өтеген батыр ауылында алғаш рет футболдан “Алматы облысы әкімінің кубогі” облыстық турнирі өтті. 30 маусымда жалауы желбіреген жарысқа 9 команда, 160 спортшы қатысты.
Турнир Іле ауданындағы жасөспірімдер спорт мектебінің стадионында өтті. Игі шара тұңғыш рет Алматы облысы әкімінің кубогіне арналып отыр. Аяқ доп додасына облысымыздың Қонаев қаласы мен тағы жеті ауданынан 8 команда сурыпталып келіп сайысқа сап түзеді. Еуропа чемпионатымен қатар ту көтерген облыс біріншілігі Алматы облысының әкімі Марат Сұлтанғазиев арнайы келіп ашты.
– Бүгінгі басталған спорт жарысымыз Еуропа кубогімен қатар өтіп жатыр. Бізден де болашақта сондай үлкен ареналарда ойнайтын спортшылар шықса деймін. Алматы облысының спортшылары Париж олимпиадасына 5 адам жолдама алды. Бұл біз үшін үлкен жетістік, – деді өңір басшысы.
Әуесқойлар арасындағы алғашқы кездесу Іле мен Жамбыл ауданының жастары арасында өтті. Қос тараптың да дайындығы тастай, алаң иелері намысты қолдан жібергілері келмей барын салып додалы ойын көрсетті. Төрешілер әр таймға 25 минут уақыт белгілеген. Алғашқы таймда 1:1 есебімен екі жақ тең түсті.
Іле ауданы құрамасының жаттықтырушысы Дәулетбай Сабыров ойын барысы туралы: “Екі команданың да дайындығы жақсы. Бір-бірімен ойнап жүрген командалар. Қазір алғашқы тайм аяқталды. Есеп 1:1. Енді екінші таймда қайсысының бабы мықты сол жеңеді деп ойлаймын. Жарыс керемет өтіп жатыр.” – деп пікір білдірді.
Турнир қорытындысы бойынша 8 өңірден келген аяқ доп шеберлері арасынан жүйріктің жүйрігі атанып, 500 мың теңге көлеміндегі сыйақыны Қонаев футболшылары, екінші орынды 300 мың теңге сыйақымен Кеген жастары, жүлделі үшінші орынды 200 мың көлемінде сыйақымен Іле ауданының командасы иеленді.
Жарыстың өтуіне Іле ауданының әкімдігі мен Алматы облысының дене шынықтыру және спорт басқармасы және үлкен турнирді ұйымдастыруға “Алатау жастары” ұйымы да үлкен үлес қосты.
Аталмыш спорт мерекесі облыстағы бұқаралық спорт түрлерін барынша дамытуға бағытталып отыр. Айта кетерлігі, аталған турнир футбол маусымының ашылуы мен алдағы уақытта барлық аудандарда өтетін футбол жарыстарының бастауы болды.
Бағдат Шойбас,
Іле ауданы
