Алматы облысында шомылу маусымы басталғалы құтқарушалар 14 азаматты құтқарды. Адамдардың қайғылы жағдайға тап болуына рұқсат етілмеген аумақта суға түсу, қауіпсіздікті сақтамау, мас күйінде шомылу себеп болып отыр. Бұл туралы баспасөз мәслихатында облыстық Төтенше жағдайлар департаменті азаматтық қорғаныс басқармасының бастығы Ералы Разақұлов мәлімдеді.
Спикердің сөзінше, шомылу маусымы басталғалы балалар өлімі тіркелген жоқ. Жазатайым жағдайдан құтқарушылар 14 азаматтың өмірін сақтап қалған. Дегенмен, оқыс оқиға салдарынан 5 адам көз жұмған.
Департамент суда адамдардың өліміне жол бермеу үшін тиісті шаралар қабылдауда. Судағы қауіпсіздіктің қарапайым ережелерін сақтау бағытында үгіт-насихат жұмыстары үзбей жүргізіліп келеді. Мәселен, суға шомылу басталғалы 5 мыңнан аса рейд жүргізілген.
«Биыл аймақта облыс әкімдігінің қаулысымен жағажайда демалуға арналған 103 орын белгіленді, оның ішінде 7 коммуналдық жағажай бар. Тұрғындардан, қала қонақтарынан тек шомылуға рұқсат етілген жерлерде демалуды және балалар қауіпсіздігіне баса мән беруді сұраймыз», – деді Ералы Разакулов.
