Шамалған ауылында орналасқан Мұхтар Әуезов атындағы орта мектепте жазғы демалыс басталғалы бері «Айгөлек» атты балалар лагері жұмыс істеуде. Бұл мектеп оқушыларының демалыс күндерін тиімді өткізіп, жаңа оқу жылына тың серпінмен келулеріне өз үлесін қосатыны сөзсіз.
Білім шаңырағының ұстаздар ұжымы ұйымдастырған бұл мектепішілік лагерь ақылы демалыс орындарына бара алмайтын балалар үшін өте тиімді. Мектептің бастауыш сынып мұғалімі Фарида Өтегенованың айтуынша, мұнда балалар жақсы демалып қана қоймай, көп нәрсені үйренеді. Ол үшін түрлі шаралар ұйымдастырылып, танымдық ойындар өткізіледі.
Атап айтқанда, лагерьде «Өнер күнін», «Спорт күнін», «Саяхат күнін» өткізу дәстүрге айналған. Мысалы, «Өнер күні» балалар ән салу, көркемсөз оқу, сурет салу байқауларына қатысып, театр әлеміне саяхат жасайды. «Спорт күні» де өте тартысты өтетінін айта кету керек. Балалар түрлі спорттық шараларға белсене қатысып, кейбірінің спортшы болуға деген құштарлығы осы кезден бастау алады. «Саяхат күні» демалушылар тәрбиешілерімен бірге өлкенің мәдени-тарихи орындарымен танысуға мүмкіндік алады. Бір қуанарлығы, Шамалғанда мұндай орындар баршылық. Атап айтқанда, «Атамекен» тарихи-мәдени орталығы, Қарасай батыр атындағы орта мектепте орналасқан «Шапағат» мұражайы мен «Үшқоңыр» спорт кешені қашанда келушілерді қарсы алуға дайын.
Балалардың өздерін тануға бағытталған психологиялық тренингтің де алатын орны ерекше. Ойын арқылы бір-бірімен араласа отырып, жақсы әсер алып, қоғамдық ортада өздерін дұрыс ұстауға дағдыланады. Өздерін қызықтыратын бағыттарды айқындап, қабілеттерін шыңдайды.
Міне, «Айгөлек» жазғы лагері осылайша тәуелсіз мемлекетіміздің саналы ұрпағын қалыптастыруға қарлығаштың қанатымен су сепкендей өз үлесін қосып келеді.
Қуат Қайранбаев,
Қарасай ауданы
