Алматы облысында Парижде өткен Олимпиада ойындарында облыс намысын абыроймен қорғаған спортшыларды салтанатты түрде құттықтады.
Қонаев қаласында өткен іс-шарада аймақ басшысы Марат Сұлтанғазиев спартакиада жеңімпаздарын құттықтап, облыс кәсіпкерлері атынан бағалы сыйлықтар табыс етті. Әкім халықаралық аренада туған өлкенің абыройын асқақтатып жүрген спортшыларға облыс кәсіпкерлері қолдау көрсетуге әрқашан дайын екенін атап өтті. Жалпы жүлде қоры 24 миллион теңгені және 4 пәтерді құрады.
“Біз сіздерді мақтан тұтамыз, сіздердің медальдарыңыз – бұл жай ғана спорттық жүлделер емес, олар – батылдықтың, қайсарлықтың және Отанға деген шексіз сүйіспеншіліктің нағыз үлгісі” – деп атап өтті өңір басшысы өзінің құттықтау сөзінде.
«Бұқаралық спортты дамыту және чемпиондарымызды қолдау – біздің алға қойған негізгі міндеттеріміздің бірі. Алдағы уақытта да спортшыларымызға жаңа жарқын жеңістерге жету үшін барлық жағдайды жасай береміз», – деп сендірді Марат Сұлтанғазиев.
Әкім Алматы облысының барша кәсіпкерлері атынан Олимпиаданың күміс жүлдегері Демеу Жадыраевқа 10 миллион теңгенің сертификаты мен үш бөлмелі пәтердің кілтін табыс етті. Қола жүлдегер Назым Қызайбайға да облыс басшысының қолынан бизнес қауымдастығының сыйлықтары: 3 бөлмелі пәтердің кілті мен 2 миллион теңгенің сертификаты табыс етілді.
Спортшылардың бапкерлері де марапатсыз қалмады: Жұмақан Тұрғанбеков пен Боранбек Қоңыратов өңірдегі кәсіпкерлерден 2 миллион теңгенің сертификаттары мен екі бөлмелі пәтердің кілтін алды.
Сонымен қатар, облыстан барған басқа қатысушылар да құр қол қалмады. Олар кәсіпкерлер атынан 2 миллион теңгенің сертификаттарын алды.
* Эдуард Ещенко (стенд ату), Қазақстан Республикасының халықаралық спорт шебері, Азия ойындары мен әлем кубогының жеңімпазы;
* Әсем Өренбай (стенд ату), Қазақстан Республикасының халықаралық спорт шебері, Азия ойындары мен әлем кубогының жеңімпазы;
* Мария Дмитриенко (стенд ату), Қазақстан Республикасының халықаралық спорт шебері, Қазақстан Республикасының және халықаралық турнирлердің бірнеше дүркін чемпионы, әлемнің, Азия кубогының және Азия ойындарының екі дүркін қола жүлдегері;
* Никита Чирюкин (ату), Қазақстан Республикасының халықаралық спорт шебері, Қазақстан Республикасының және халықаралық турнирлердің бірнеше дүркін чемпионы, әлем және Азия чемпионы, Әлем кубогы мен Азия ойындарының қола жүлдегері.
