Талғар ауданы Өстемір ауылының тұрғындары «Ұлы дала жорығы – 2024» марафон бәйгесінің жүлдегері – «Алатау» командасының шабандоздарын салтанатпен қарсы алды. Қазақтың көрнекті геолог-ғалымы Қаныш Сәтбаевтың 125 жылдығына орай өткен аламанда «Ботай – Астана» бағытында 500 шақырымдық жолды 5 күнде шауып өткен жорықшылар күміс жүлдені қанжығасына байлады.
Ұлттық спортты дәріптейтін додаға еліміздің ең таңдаулы командаларымен қатар әлемнің әр қиырынан келген 10-ға жуық команда қатысты. Төрт түліктің төресі – жылқы малының ұшқырлығы мен төзімі сыналған бәсекеде талғарлық шабандоздар «Жетісу» мен «Маңғыстау» командаларын шаң қаптырды. Өздеріне тым сенімді қырғыз атбегілерінің шашасына шаң жұқпаған жүйріктерін де жолда қалдырды.
Баласы атқа шапса да дүркіретіп той жасайтын халқымыз мұндай қуанышта қарап қалсын ба?! Аудандық дене шынықтыру және спортты дамыту орталығы мен Нұра ауылдық округі әкімдігі ұйымдастырған шараға ауылдың еңкейген қартынан, еңбектеген баласына дейін жиналды. Алақандай ауылдан шығып, Алатаудай абыроймен оралған жігіттерге аналар шашу шашып, ақсақалдар бата берді.
Республикалық «Ер намысы» қоғамдық бірлестігінің төрағасы Ерболат Алиядин, грек-рим күресінен Азия және әлем чемпионы, Талғар аудандық №1 балалар мен жасөспірімдер спорт мектебінің директоры Ербол Қоңыратов, аудандық дене шынықтыру және спортты дамыту орталығының басшысы Жандос Бұсырманов жеңімпаз жігіттерді құттықтады.
«Алатау» командасының президенті Қуат Әшімұлы жеңіс жолын былай баяндады: «2022 жылы құрылған команда «Ұлы дала жорығына» төртінші рет қатысып отыр. Биыл жарыс жолы тасты және асфальт болды. Аттардың аяғы тасырқап, екеуі жарысты жалғастыра алмады. Ал шабандоздарымыз – ат үстінде өскен ауыл балалары, шу асауды еркіне бағындырған ержүрек жігіттер. Өткен жылдарға қарағанда жарыс жолы қысқарғандықтан жылдамдық жоғары болды. Сағатына 25-30 шақырымда шауып отырдық. Осы жолы еліміздегі мықты командаларды басып озып, балқарларға ғана есе жібердік. Алайда, бұл – біз үшін үлкен жетістік».
Бұл жетістік «Алатау» командасына үлкен мүмкіндіктер әкелді. Дубай, Ресейден шақырту түскен. Алда үлкен додалар күтіп тұр. Аттың жалында ойнаған жігіттерге сәттілік тілейміз!
Зорагүл Әбдіқадір
Талғар ауданы
