Қакелең қаласындағы Сулейман Демирел университетінде «QONAEV CUP –2024» атты халықаралық шахмат турнирі үшінші рет өз жалауын желбіретті. Адамның ой-өрісі мен шеберлігін шыңдайтын додаға АҚШ, Индонезия, Беларусь, Украина, Армения, Ресей, Өзбекстан, Тәжікстан, Қырғызстан, Әзербайжан, Грузия және өз елімізден іріктеліп шыққан алты мен алпыс жас арасындағы 200-ге жуық шахматшы қатысты.
Салтанатты шарада сөз сөйлеген облыс әкімі Марат Сұлтанғазиев «QONAEV CUP –2024» турниріне келген қонақтарға алғыс білдірді.
– Бұл жарыс Алматы облысының, жалпы Қазақстанның шахматшыларына халықаралық дәрежедегі гроссмейстерлермен сынға түсіп, мол тәжірибе жинақтауға, елімізде осы спорт түрінің дамуына үлкен үлес қосады деп сенемін. Шахмат ойыны ұлты мен жасына қарамастан адамдардың бір-бірімен араласуына, достық қарым-қатынас құруына септігін тигізеді. Бүгінгі турнирге қатысушыларға сәттілік тілеймін. Жеңіс тұғырына шынайы лайықтылар көтерілсін! – деді Марат Елеусізұлы.
Осыдан кейін Қазақстан Шахмат федерациясының вице-президенті Бекет Жароков, SDU University-дің ректоры Әлімжан Игенбаев және Шахмат олимпиадасының күміс жүлдегері, әлем чемпионы Алуа Нұрман мінберге көтеріліп, қатысушыларға игі тілектерін жеткізді.
Дәстүр бойынша, «QONAEV CUP –2024» халықаралық шахмат турнирін бастау үшін ортаға Америка Құрама Штаттарының өкілі, аты «Гиннес» рекордтар кітабына енген халықаралық дәрежедегі гроссмейстер Тимур Гореев пен даңқты қазақстандық шахматшы Алуа Нұрман шақырылды. Олар шахмат тақтасы жайылған столға жайғасқаннан кейін, алғашқы жүріс жасау құрметі Марат Елеусізұлы мен Әлімжан Игенбеавқа жүктелді. Осылайша әлемдік деңгейдегі дүбірлі дода басталды.
Жарысқа келген танымал шахматшылардың арасында армениялық Храир Симонян мен Григор Диланян, Беларусь елінің өкілі Михаил Никитенко, әзірбайжандық Жамал Маммадов, ресейлік Александр Рахманов, грузиялық Леван Пантулая, өзбекстандық Жахонгир Вахидов, Тәжікстан өкілі Сухаммад Хуссейнходжаев, украиналық Александр Моисененко сияқты бекзат ойынның бесаспаптары да бар. Дегенмен, Қазақстанның әр шалғайынан келген спортшылардың қарасы әлдеқайда көп екені аңғарылып тұрды.
Қуат ҚАЙРАНБАЕВ
Қарасай ауданы
