Өңірлік коммуникациялар қызметінің ақпараттық алаңында Қонаев қаласының әкімшілік құқықбұзушылықтар жөніндегі мамандандырылған ауданаралық сотының қызметі туралы баяндалды.
Ең алдымен сот төрағасы Әлінасыр Қадыров 26 қарашаға дейін атқарылған жұмыстарға тоқталды. Оның сөзінше, қазірге дейін сотта 3570 іс қаралып, оның 3149-ына әкімшілік шара қолданылған. Сонымен қоса, 2370 іс бойынша 321 млн 699 мың теңге айыппұл салынған.
– Қазірге дейін 466 азаматқа әкімшілік қамақ жазасы тағайындалып, 83 адам көлік жүргізу құқығынан айырылды. 87 шетел азаматы Қазақстан Республикасының шекарасынан шығарылса, 167 адамға құқықтан айыру сынды қосымша жаза тағайындалды. 35 заңды тұлға лицензиясынан айырылды, – деді Қонаев қаласының әкімшілік құқықбұзушылықтар жөніндегі мамандандырылған ауданаралық сотының төрағасы Әлінасыр Қадыров.
Спикердің сөзінше, аталған әкімшілік құқықбұзушылықтардың арасында жол-көлік оқиғалары мен отбасылық қатынастардағы келеңсіздіктер жиі кездеседі. Айталық, жол қозғалысы қауіпсіздігіне байланысты 1619 іс қаралып, 1561 жеке тұлғаға айыппұл салынған. Ал отбасы, тұрмыстық қатынастар аясындағы құқыққа қарсы әрекеттер бойынша 528 іс қаралып, 206 жеке тұлғаға әкімшілік шара қолданылған.
Ерзат АСЫЛ
