Еңбекшіқазақ ауданында жылдам шахматтан Алматы облысы Кубогының ақтық кезеңі өтті. Қатысушылар Алматы облысының барлық аудандары мен Қонаев және Алатау қалаларынан келді. 8 жас санатындағы 6 жастан 70 жасқа дейінгі шахматшылар бәсекеге түсті. Өткен жылғы Кубок жеңімпаздары да жарыстан тыс қалмады. Шахмат ойыны швейцариялық рапид жүйесінде 9 турдан тұрды. Ойын уақыты алғашқы жүрістен бастап 10 минут 5 секундқа жалғасады. Жеңімпаздар барлық турларда жинаған ұпайларының көрсеткішіне қарай анықталды. Жарыс Алматы облысының барлық елді-мекендерінде әртүрлі жастағы шахмат әуесқойлары арасында қарқынды арттыру, ойыншылардың кәсіби деңгейін арттыру, біліктілік нормаларын орындау, Алматы облысының құрамасына кіл мықтыны анықтау мақсатында ұйымдастырылды.
«Шахмат ойыны баланың ойлау қабілетін дамытуға көмектеседі. Өйткені, бұл – логикалық ойын. Ойында жаңа комбинацияға негізделген қадамдар ойлап табылады. Яғни, интеллектуалдық қабілеттілікті арттыруда таптырмас спорт түрі. Байқасақ, ата-аналар да баласын ерте жастан дамытуға көңіл бөледі. Біздің баста мақсатымыз: шахматты барлық елді-мекендерде танымал ету. Сондықтан, кезекті ойынды шалғай жақтағы ауылдарда өткізуге тырыстық. Алматы облысында бұл интеллектуалды ойын жақсы деңгейде дамып келеді», – дейді Алматы облыстық Шахмат федерациясының президенті Сарсенғали Жанқуатов.
Бұл жарыс балалар үшін тек басқа шахматшылармен танысып, жаңа орта құру емес, сонымен қатар келесі жылы еліміздің түрлі қалаларында өтетін жылдам шахматтан Қазақстан кубогына қатысу үшін іріктеуден өту мүмкіндігі.
Жалпы Алматы облысы кубогының ақтық кезеңі тартысты өтті. Командалық есепте бірінші орында – Талғар ауданы, екінші орында – Қарасай ауданы, үшінші орында – Еңбекшіқазақ ауданы көш бастады. Өз жас категорияларында Абдухамид Әсия, Дәулет Дарменияр, Абдухамид Әмір, Бұланбаева Нұрия, Тойбол Сұлтан, Алтынбек Алтынай, Мелс Дінмұхамед, Шакенова Кәмила, Тойбол Диас, Қадыр Мадина, Ермеков Заманбек, Кодир Н. жарыс жеңімпазы атанды.
