Қаскелеңдегі аудандық кітапхананың коворкинг орталығында үкіметтік емес ұйымдар мен мемлекеттік органдардың өкілдері тұрақты даму, қалдықтарды басқару және климаттың өзгеруі сынды маңызды тақырыптар бойынша кездесу өткізді. Іс-шара «ЭкоДиалог» жобасы аясында ұйымдастырылды.
Жиын барысында ерекше назар ауылдық жерлердегі қалдық мәселесіне аударылды. Халық санының өсуі, жеке сектордың дамуы, табиғи қоқыс төгетін жерлердің пайда болуы, қоқыс полигонының жетіспеушілігі және заманауи қайта өңдеу инфрақұрылымының жоқтығы қоршаған ортаға үлкен қауіп төндіретіні айтылды. Бұл тек экологиялық тәуекелдер тудырып қана қоймай, халық денсаулығына, таза ауызсуға қолжетімділікке және жалпы өмір сапасына әсер етеді.
Шараға қатысушылар Қарасай ауданына арналған 2025-2028 жылдарды қамтитын коммуналдық қалдықтарды басқару бағдарламасымен танысты. Онда қатты тұрмыстық қалдықтарды көмуге арналған жоғары технологиялық «Айтей» кешенді алаңын салу қарастырылған. Сонымен қатар экотехнопарк құру да жоспарланған.
Сарапшы Ольга Мельникова климаттың өзгеруі мен қалдық мәселесінің байланысын атап өтті. Оның салдары ауылдық жерлерде айқын сезілетінін, ауыл шаруашылығы циклдерінің бұзылуына, су тапшылығына және санитарлық жағдайдың нашарлауына әкелуі мүмкін. Сонымен қатар жиында әйелдер мен жастарды экологиялық бастамаларға тартудың маңыздылығы да кеңінен сөз болды.
Гендерлік мәселелер мен фандрайзинг бойынша сарапшы Гүлнара Тойшынова экологиялық жобалардың қаржылық тұрақтылығы мен халықаралық гранттық мүмкіндіктерді таныстырды. Бұл үкіметтік емес ұйымдарға ұзақ мерзімді даму стратегиясын құруға жол ашады.
Шараға қатысқан мемлекеттік органдар өкілдері де өз пікірлерін ортаға салды. Қарасай аудандық ішкі саясат бөлімінің басшысы Гүлнар Молдамсейітова жергілікті атқарушы органдар мен үкіметтік емес ұйымдардың экология мәселесінде бірлесе жұмыс істеу керек екеніне тоқталды. Аудандық тұрғын үй-коммуналдық шаруашылық бөлімінің маманы Асылхан Өмірбек қоғамдық диалог мәдениетін қалыптастыру қажеттігін айтты.
Жиын соңында мемлекеттік емес ұйымдар мен мемлекеттік құрылымдар арасындағы тиімді ынтымақтастық механизмдері талқыланды. Сонымен қатар қалдықтарды басқару жағдайын жақсарту бойынша ұсыныстар да тыңдалды.
Мұндай жиындар тәжірибе алмасуға, жаңа бастамаларды қалыптастыруға және қоршаған ортаны қорғау мен тұрақты дамуды қамтамасыз ететін нақты шешімдерді қабылдауға мүмкіндік береді.
Қуат Қайранбаев
Қарасай ауданы