Кеген ауданы Қарабұлақ ауылында шағын футболдан көшеаралық жарыс өтті. Ашылу салтанатына ауылдық округ әкімі Рүстем Әлімов, жарысқа демеушілік танытқан кикбоксингтен Әлем кубогінің иегері, екі дүркін Еуропа мен Азия чемпионы Елмұрат Қайыпжанов және ауыл тұрғындары қатысты.
Ауылдық ақсақалдар алқасының төрағасы Серік Тоқтасынұлы қатысушыларға ақ батасын беріп, ақ жаулықты аналар шашу шашты. Аталған жарыста Қ.Сәтбаев, Абай, Н.Мәшкеев, С.Бейсембетұлы, М.Әуезов, Н.Тұрғанбеков, Ә.Жүнісов, М.Жартыұлы, С.Қанайұлы. Р.Құтелов көшелері мен «Рабат» шекара бөлімшесінің командалары қатысып, өзара бақ сынасты.
Тартысты өткен ала доп бәсекесінде І және ІІ орындарды «Рабат» шекара бөлімшесінің командасы иеленді. Ал ІІІ орын Ә.Жүнісов көшесінің командасына бұйырды. Жеңімпаздарға ақшалай сыйлықтар табысталды. Бұдан бөлек, топтан оза шапқан ойыншылар да жүлдеден құр қалмай, түрлі марапаттарға ие болды.
– Әр көше тұрғындары ыстық ас пен ақ самауырдан шайын ұсынып, жалынды ұран сөздерін көтеріп, мерекелік көңіл сыйлады. «Бірлігі бекем ел озады» деген бабалар сөзі осындай ынтымаққа негізделсе керек. Бастаманы қолдаған көпшілікке, табандылықпен ұйымдастыра білген көше басшыларына, спорт нұсқаушылары мен «Рабат» шекара бөлімшесіне, ауылдық ақсақалдар алқасы мен аналар кеңесіне алғыс айтамыз. Салауатты өмір салтын насихаттау жолында ауқымды жарыстар жалғаса береді, – деген ауыл әкімі Рүстем Жеңісұлы тұрғындарға ризашылығын білдірді.
Айта кетейік, жарыс былтыр аудан әкімінің қолдауымен күрделі жөндеуден шағын футбол алаңында өтті.
Дәурен ӘБУТӘЛІПОВ,
Кеген ауданы
