Мектеп асханаларында пайдалы, сапалы және толыққанды тамақ ұсыну мәселесі қай кезде де өзектілігін жойған жоқ. Үлкендер ғана емес, балалар денсаулығы да сыр беретін бүгінгі таңда оның маңыздылығы тіпті де артып отыр. Осыған орай саналы ғұмырын қоғамдық тамақтануды ұйымдастыруға арнап, Алматы қаласында мейрамхана желісінің өндірісін басқарған, осы саланың білгір маманы, Қарасай ауданындағы «Айкул» ЖШС-не қарасты «Khama Park» мейрамханасының атқарушы директоры әрі облыстық мәслихаттың депутаты Серікхан Әділхановтан балаларды дұрыс тамақтандандыруды жақсартуға қатысты ойын сұрап білген едік.
– Мектеп асханаларында тамақтандыруды ұйымдастыру – біздің балаларымыздың денсаулығына, дамуына және үлгеріміне әсер ететін негізгі факторлардың бірі деп толық айта аламын, – дейді ол. – Өкінішке орай, бұл салада көптеген кемшілік кездеседі. Маңызды мәселені шешуге өз үлесімізді қосу үшін әріптестерімізбен бірге оқушыларды тамақтандыру комбинатын ашуды жоспарлап отырмыз. Бұл комбинат балаларды сапалы және пайдалы тағамдармен қамтамасыз етудің негізі болады. Осылайша біз балаларға теңдестірілген, дәмді және пайдалы тағамдарды ұсынуға кепілдік беретін жүйе құруға ұмтылудамыз, ол қазіргі заманғы стандарттарға сәйкес келетін болады.
Оның айтуынша, қолға алынған комбинат мектептердегі тамақтандыру жүйесінің маңызды буыны болмақ. Қазіргі уақытта инфрақұрылымды дамыту, жабдықтарды сатып алу және сапалы өнім жеткізушілермен ынтымақтастық орнату бойынша белсенді жұмыс жүргізілуде.
– Ең алдымен, тағамдар ассортиментін әзірлеу және жақсы ойластыру маңызды, – деп түсіндірді Серікхан Сәметұлы. – Жаңа комбинатта түрлі тағамдардың кең таңдауы ұсынылатын болады. Ол ең алдымен, жергілікті өнімдерден дайындалған дәстүрлі тағамдардан тұрмақ. Бұл өте маңызды, себебі біз мәдени және гастрономиялық кодымызды ұстануымыз керек. Екіншіден, балалардың күш-қуатын арттырып, денсаулығын жақсарту үшін қажетті теңдестірілген негізгі тағамдар – сорпа, ботқа және басқа да ыстық тамақтар болуы шарт. Сондай-ақ жас ағзаның дамуына пайдалы жеңіл тағамдар мен сусындарға да назар аударылуы тиіс. Оған табиғи йогурттар, жеміс сығындылары және шырындар жатады.
Серікхан Сәметұлының сөзінше, тағам сапасын бақылауға ерекше көңіл бөлінбекші. Осыған байланысты бастамашыл топ мүшелері шикізатты таңдау мен тағамдарды мектептерге жеткізу кезеңдерінде заманауи бақылау жүйелерін енгізуді жоспарлап отыр. Бұл қадам тамақтанудың жоғары сапасын және қауіпсіздігін қамтамасыз етеді.
Бұл істе технологиялар мен инновациялық шешімдер де маңызды. Комбинат заманауи озық жабдықтармен жабдықталады, бұл оның өнімділігін арттыруға және шығындарды азайтуға, сондай-ақ тамақтануды барлығына қолжетімді етуге мүмкіндік береді.
– Комбинатты ашу 2025 жылға жоспарланған, – деп қорытындылады сөзін Серікхан Сәметұлы. – Біз бұл жобаның мектептерде тамақтану мәдениетін қалыптастыруға негіз болатынына сенімдіміз. Ол тек балаларды пайдалы тамақпен қамтамасыз етіп қана қоймай, өсіп келе жатқан ұрпақтың дұрыс тамақтану әдетін қалыптастыруға да септігін тигізеді. Біз Қазақстандағы әрбір баланың денсаулығы мен әл-ауқаты жақсы болуын қалаймыз!
Игі бастама балалардың сапалы тамақтануына жол ашады деп сенеміз. Дүкенде қаптаған шетелдік өнімдерден гөрі, пайдалы аспен баланы тамақтандыру әлдеқайда тиімді болмақ.
Қуат Қайранбаев,
Қарасай ауданы
