Мемлекет басшысы Қасым-Жомарт Тоқаев: «Отбасындағы тұрмыстық зорлық-зомбылықтың алдын алу жұмысының тиімділігін арттыруға ерекше назар аудару және алдын алу шараларын кешенді түрде жүргізу қажет. Бұл мәселе әділетті мемлекет құру үшін өте маңызды. Көптеген әлеуметтік кеселдің түп тамыры, соның ішінде қылмыс көбіне тұрмысы нашар отбасылардан бастау алады. Мұндай отбасылардағы зорлық-зомбылықтар балалардың сана-сезіміне және психикасына кері әсерін тигізеді», – деген болатын.
Президент тапсырмасына сәйкес өңірде Отбасын қолдау орталықтары құрылып, өмірлік қиын жағдайда қалған отбасыларға кешенді түрде қызмет көрсетіп келеді. Жамбыл ауданының Ұзынағаш ауылында да Отбасын қолдау орталығы жұмысын бастады. Ашылу салтанатына облыстық жұмыспен қамтуды үйлестіру және әлеуметтік бағдарламалар басқармасының басшысы Айгүл Ахметова, аудан әкімі Нұрлан Ертас және тұрғындар қатысты.
Отбасы институтын нығайту мақсатында құрылған мекеменің ашылуында аудан әкімі Нұрлан Ертасұлы:
– Бұл – орталық тұрғындардың әлеуметтік мәселелерін шешуге бағытталған маңызды қадам. Өйткені әрбір отбасы – қазақстандық қоғамның негізгі ұяшығы. Осы мекеме арқылы көмекке мұқтаж тұрғындарымызға барынша жәрдемдесіп, отбасылардың әл-ауқатын арттырамыз деп сенеміз, – деді.
Облыстық жұмыспен қамтуды үйлестіру және әлеуметтік бағдарламалар басқармасының басшысы Айгүл Ахметова құттықтау сөзінде орталықтың маңыздылығына тоқталып, мұндай мекемелер бұған дейін бірнеше ауданда ашылғанынан хабардар етті. Бұл орталық қызметкерлерінің де қиын жағдайға тап болғандардың әлеуметтік және жеке дамуына барынша қолдау көрсететініне сенім білдірді.
Жаңа мекеме отбасылардың әлеуметтік-экономикалық әл-ауқатын жақсартуға ықпал етіп, тұрмыстық қиындықтарға тап болған азаматтарды жан-жақты қолдайтыны айтылды. Сонымен бірге жастарға отбасы құндылықтарын насихаттап, тұрмыстық зорлық-зомбылықтың алдын алу шараларын жүзеге асырады. Жұмысы бірнеше бағытта жүргізіледі. Өз құқығын қорғау, тұрғын үй алу, басқа да әлеуметтік мәселелер бойынша тұрғындарға кеңес береді. Қиын жағдайға тап болғандарды психологиялық қолдауға, отбасылық дауларды шешуге жәрдемдеседі. Мұқтаж жандарға қайырымдылық көмек ұйымдастыруға қолұшын созады. Жас отбасылар үшін тренинг, семинар, арнайы бағдарламалар ұйымдастырады. Осылайша тұрғындарға сапалы және уақытылы көмек көрсету арқылы әлеуметтік тұрақтылықты қамтамасыз етуге өз үлесін қосатын болады.
Серік САТЫБАЛДИЕВ
Жамбыл ауданы
