Қазақстан Республикасы Парламенті Мәжілісінің депутаты Данияр Қасқарауов Жамбыл ауданына жұмыс сапарымен келді. Халық қалаулысы өңірдің әлеуметтік-экономикалық даму барысымен танысып, аудан активімен кездесті.
Аудан әкімдігіндегі жиында Мәжіліс депутаты Парламентте қаралып жатқан негізгі заң жобаларына тоқталып, мемлекеттік саясаттың басым бағыттарын түсіндірді. Данияр Алдабергенұлы әсіресе, халықтың әл-ауқатын арттыру, ауылдық аймақтарды дамыту, кәсіпкерлікті қолдау және білім мен денсаулық сақтау салаларын жетілдіру мақсатында заң шығарушы органның атқарып жатқан жұмыстарынан хабардар етті. Кездесу барысында аудан әкімі Нұрлан Ертас ауданның негізгі көрсеткіштері мен алдағы жоспары туралы баяндады. Өңір басшысы кейбір мәселені депутатпен бірлесіп, республикалық деңгейде шешудің маңыздылығын атап өтті. Халық қалаулысымен жиынға аудандық мәслихат төрағасы Мадияр Әмірғалиев, жергілікті атқарушы органдардың басшылары, қоғамдық ұйымдардың өкілдері мен ауылдық округтердің әкімдері қатысты.
Парламент Мәжілісінің депутаты Данияр Қасқарауов ауданға жасаған іссапары кезінде сондай-ақ аудандық полиция бөлімінің қызметкерлерімен де арнайы кездесті. Жиын барысында құқық қорғау саласындағы өзекті мәселелерді талқылады. Аудандық полиция бөлімінің бастығы, полиция полковнигі Асхат Данияр баяндама жасап, бөлім жұмысының жай-күйіне тоқталды. Ол полиция бөлімінде шешімін талап ететін мәселелерді қозғап, депутатқа нақты ұсыныстар мен сұрақтар жолдады. Данияр Алдабергенұлы полиция қызметінің маңыздылығын ерекше атап өтіп, мемлекет тарапынан құқық қорғау органдарына қолдау көрсету жалғаса беретінін жеткізді. Халық қалаулысымен кездесуде қызметкерлердің әлеуметтік жағдайын жақсарту, материалдық-техникалық базаны нығайту, құқық қорғау саласындағы кадр тапшылығын жою мәселелері де жан-жақты талқыланды.
Серік САТЫБАЛДИЕВ,
Жамбыл ауданы
