Бүгінде халықтың әл-ауқатын жақсартуға, әлеуметтік мәселелердің шешімін табуға негізделген мемлекеттік бағдарламалар баршылық. Соның бірі – «Ауыл аманаты» жобасы. 2023 жылы бастау алған бағдарлама аясында 100 млрд теңгеден астам қаржы бөлініп, 17 мың жаңа жұмыс орны ашылды. «Ауыл аманатының» шарапатын көріп, кәсібін дөңгелетіп отырған жанның бірі – Талғат Қанапияұлы.
Еңбекшіқазақ ауданы Балтабай ауылында тұратын Талғат Қанапияұлы – Қытай елінен қоныс аударған қандас. Он саусағынан өнер тамған азамат атакәсіпті нәсіп қылып қана қоймай, ұлттық құндылықтарымызды насихаттауға да үлкен үлес қосып келеді. Олай дейтініміз, кейіпкеріміз көшпелі өмір салтында ерекше маңызға ие болған киіз үй жасаумен айналысады. Бес жыл бұрын бастау алған бұл жоба жемісін беріп, пайдалы кәсіпке айналыпты. Құруы да, жиналуы да тез киіз үй жасау жолын кәсіпкер заманға лайықтап алған. Қазақтың ою-өрнегімен көмкеріп, ұлттық нақыш бояуын да жоғалтпапты. Кейінгі жылдары ұлттық құндылықтарға бет бұрған көпшіліктің киіз үйге де қызығушылығы артқаны рас. Баспананың бұл түріне жеке адамдардан бөлек, туристік орталықтар мен демалыс орындарынан тапсырыс көп түседі. Жауын-шашын өтпейтін сапалы материалдан жасалған, жазда салқын, қыста жылы киіз үйді алты ай жайлауда отыратын шопандар да қоймайтын көрінеді. Бастапқы уақытта жылына 10-15 шақты киіз үй сатса, қазір жылына шамамен 200-300 үйге тапсырыс келеді.
«Мемлекетке иек артып отыра бермей, іс бастаймын дегендерге «Ауыл аманаты» – таптырмас қолдау. Бағдарлама жайлы естігенде үй ішімен ақылдасып, бірден іске кірістік. Соның пайдасын көріп отырмыз. Ауыл адамдары кәсіп ашып, бағдарлама аясында өзінің ғана емес, жергілікті жердің өсіп-өркендеуіне үлес қоса алады», – деген кейіпкеріміз былтыр аталған бағдарлама бойынша мемлекеттен 2,5 пайызбен 3 млн теңге несие алған. Үйінің ауласында басталған кәсібі кеңейіп, шеберханасын да жаңалапты. Қажетті құрал-жабдығы да заманауи. Талғат Қанапияұлы бүгінде 15 адамды жұмыспен қамтып отыр.
«Ауылдық жерлерде жаңа жұмыс орындарын ашып, жұмыссыздықты жою, кәсіпкерлерге қолдау білдіріп, отандық өнімдердің түрі мен санын, сапасын, нарықта бәсекеге қабілеттілікті арттыру сынды маңызды мәселеде «Ауыл аманаты» бағдарламасының алар орны зор. Бағдарламаға қатысушы азаматтардың идеялары да сан түрлі, ұсынатын жобалары да жан-жақты. Оның ішінде өңдеу өнеркәсібі, жартылай фабрикаттар, қызмет көрсету саласы, құс, балық, ара ұстау, ауыл шаруашылығына қатысты және басқа да жүздеген жоба бар. Жобаның көптігі нарықта бәсекені туғызады. Ал бәсеке бар жерде, сапа да болары сөзсіз», – дейді «Қонаев» әлеуметтік-кәсіпкерлік корпорациясы» АҚ PR-менеджері Руслан Ескендір.
Алматы облысында қазіргі уақытта жалпы сомасы 1,7 млрд теңгеге 186 жоба қаржыландырылып, жұмысын атқарып жатыр. Бұлардың барлығы да нарыққа сапалы өнім, жоғары деңгейлі қызмет ұсына алатын сұранысқа сай кәсіпкерлер.
Құралай Мұратқызы
Еңбекшіқазақ ауданы
