Қарасай ауданы Қырғауылды ауылындағы «Анаға құрмет» музейінде Жұмысшы мамандықтары жылы аясында қазақтың тұңғыш әйел механизаторы, Социалистік Еңбек Ері Кәмшат Дөненбаеваны еске алу кеші өтті.
Кәмшат Дөненбаева – Қостанай облысының тумасы. Өмір жолы еңбекпен, ерлікпен және табандылықпен өрілген. Ол трактор тізгіндеген алғашқы қазақ әйелдерінің бірі болды. Қажыр-қайратының арқасында шебер механизатор атанып, ауыл шаруашылығында рекордтық көрсеткіштерге қол жеткізген.
Ленинградтағы С. Киров зауытында жаңадан құрастырылған «КА-700» атты алып техниканы сынақтан өткізуді Кәмшат Байғазықызына сеніп тапсырады. Қазақтың қайсар қызы бұл міндетті абыроймен атқарады. 1972 жылы Қостанай облысында астық жинау науқанында ерекше көзге түсіп, рекордтық өнім жинады. 1976 жылы еңбектегі жетістіктері үшін КСРО-ның ең жоғарғы марапаты – Социалистік Еңбек Ері атағын алды. Сонымен қатар ауыл шаруашылығына жаңа технологияларды енгізуге де атсалысып, тәжірибесі КСРО деңгейінде жоғары бағаланды. Өмірінің соңына дейін туған жерінде еңбек етті. Кәмшат Дөненбаеваның есімі қазақ тарихында ауыл шаруашылығының аңыз адамы ретінде мәңгілікке сақталады. Оның ерлігі мен еңбегі бүгінгі ұрпаққа үлгі.
Аталған шарада Кәмшат Дөненбаеваның адами қасиеттері жайлы жылы естеліктер айтылды. Туған-туыстары мен замандастары және өнер қайраткерлері ол кісінің асыл ана, аяулы әже, адал жар ретінде тек отбасына ғана емес, барша қазақ халқына үлгі болғанын атап өтті. Шара барысында белгілі қылқалам шебері, Мемлекеттік сыйлықтың лауреаты Жанұзақ Мүсәпір Еңбек Ері бейнеленген портретті музейге тарту етті.
«Кәмшат анамыздың көздерінен мейірім төгіліп тұрады. Суретте еңбекпен шыңдалған жанның қайсарлығын бейнеледім. Сондай-ақ аналық махаббатын да барынша жеткізуге тырыстым», – дейді Жанұзақ Керімбекұлы.
Еске алу кеші дала еңбеккерлерінің ерлігі мен ананың мейірімін ұлықтайтын шара болуымен қатар болашақ ұрпаққа аманат етілген тағылымды тарихтың бір парағы ретінде де айқындалды. Кәмшат ана бейнесі – қазақ әйелінің қайсарлығы мен еңбексүйгіштігінің мәңгілік символы болып қала бермек.
Айта кетейік, «Анаға құрмет» музейі – қазақ әйелдерінің қоғамдағы рөлін дәріптеп, олардың ерен еңбегін ұрпақ жадында жаңғыртуға ден қойып келе жатқан мәдени орын. Бұл музейде елдің дамуына үлес қосқан ардақты аналардың өнегелі өмірі насихатталады.
Балгүл Тілеуберген,
«Анаға құрмет» музейінің экскурсия жетекшісі
Қарасай ауданы
