Мемлекет басшысы Қасым-Жомарт Тоқаев биылғы жылды «Жұмысшы мамандықтары жылы» деп жариялағаны белгілі. Осыған орай «АМАNАТ» партиясы Алматы облыстық филиалының ұйытқы болуымен «АМАNАТ» – еңбек адамымен» атты жоба жүзеге асуда. Жоба аясында Балқаш аудандық Мәдениет үйінде «Дәулет – Бекет» ЖШС директоры Сыдық Дәулетовпен кездесу өтті.
Шараны ашқан аудан әкімі Азат Құтпанбетов құрметті қонақты таныстырып, сөз кезегін берді.
Сыдық Әбуұлы түйе шаруашылығын дамытуда бастан өткерген қиындығы мен бүгінгі жетістігі жайында кеңінен әңгіме өрбітті. Жас күнінде армандаған мақсатына өзінің еңбекқорлығының арқасында қол жеткізгенін және адал еңбекпен тапқан нанның бойға сіңімді болатынын айтып, осы атқарған жұмысының нәтижесінде көптеген марапатқа ие болғаны жайында сөз қозғады. Сол марапаттардың ішінде «Құрмет», «Парасат» ордендерін алған сәттерге тоқталды.
Еңбек адамы шаруашылықтағы түйелердің жайы, оларды күтіп-бағудың ерекшелігі, сүт өнімдерін дайындайтын зауытта бірнеше адамды тұрақты жұмыспен қамтып отырғаны және дайындалған өнімдерді шет мемлекеттерге экспорттап жүргені турасында да әңгімелеп берді.
Сыдық Әбуұлы қоғамдық жұмыстарға да белсенді араласып, Іле аудандық мәслихатының бірнеше шақырылымының депутаты болған. Қайырымдылық іспен де айналысып, Ақши ауылындағы мектеп, балабақшаға демеушілік жасап, тұрмысы төмен отбасыларға жәрдемдесіп, көпбалалы аналарға тұрғын үй де алып берген.
Аудан тұрғындары еңбектің қара қазанын қайнатып жүрген шаруашылық иесіне ризашылықтарын білдіріп, еңбегіне толағай табыс тіледі.
Кешті қорытындылаған «АМАNАТ» партиясы Алматы облыстық филиалының атқарушы хатшысы Ерлан Жұмашұлы адамға ерекше күш-жігер беретін игі шараның қазақтың біртуар перзенті, нағыз еңбек адамының үлгісі болған Дінмұхамед Қонаевтың атамекенінен бастау алғанын жақсылыққа балап, мұндай кездесулер басқа аудандарда да жалғасын табатынын жеткізді.
Бақтығали ДӘУІТБАЕВ
Балқаш ауданы
