Таяуда Қазақстан Жазушылар одағының төрағасы Мереке Құлкенов пен Алматы облысының әкімі Марат Сұлтанғазиев өңірдегі қаламгерлерді қолдау меморандумына қол қойып, Қазақстан Жазушылар одағы мүшелеріне грант бөлу, кітаптарын шығару жоспарланған-ды. Сондай-ақ ауылдан шыққан қаламгерлерді мектеп оқушыларына таныстыру іс-шаралары да қарастырылған болатын.
Осыған орай, Еңбекшіқазақ ауданы Достық ауылындағы Социалистік Еңбек Ері Алтынбике Бертаева атындағы орта мектепте Шелек өңірінде туып-өскен Қазақстан Жазушылар одағының мүшелері Иминжан Тохтияров пен Авут Масимов және Қазақстан Журналистер одағының мүшесі Анарбек Бердібаевтың шығармашылығына арналған әдеби-сазды кеш өтті.
Ауыл әкімдігінің қолдауымен мектеп ұжымы ұйымдастырған «Өнерімді еліме арнаймын» атты кездесуде қаламгерлердің өмірбаяны мен шығармашылығы жан-жақты таныстырылды. Атап айтқанда, Байсейіт ауылының тумасы, ақын, «Құрмет» орденінің иегері, Еңбекшіқазақ ауданының Құрметті азаматы Иминжан Исмайылұлы оншақты жыр жинақтың авторы. 200-ге жуық ән мәтінін жазуымен де танымал. Ақын Шөмішбай Сариевтің «Дүниені жалт қаратсам деп едім» атты кітабын ұйғыр тіліне аударған.
Ал балалар жазушысы Авут Масимов Қаратұрық ауылында дүниеге келген. Қазақстан Жазушылар одағы басқарма төрағасының ұйғыр әдебиеті бойынша кеңесшісі. Республикалық «Құлагер» бәйгесінің жүлдегері.
Қаламгер Анарбек Мөкішұлы – «Ғұмыр – көш» жыр жинағының авторы. Ұйғыр ақындарының кітабын қазақ тілінде сөйлеткен, соның ішінде Иминжан Тохтияровтың, Авут Мәсимовтің туындылары бар. Оннан аса ән мәтінін жазған.
Кездесуде мектеп оқушылары үш қаламгердің өлеңдерін жатқа оқыды, ән шырқап, сахналық қойылым көрсетті. Қонақтарға сұрақтар қойып, тұшымды жауаптар алды. Кеш барысында халықтар достығына дәнекер болып жүрген Анарбек Бердібаевты республикалық ұйғыр этномәдениет орталығы облыстық филиалының төрағасы Әркинжан Жумаев «Ғамхор» медалімен марапаттады. Әдеби кешке жиналған көпшілік ерекше әсер алып қайтты.
Өз тілшіміз,
Еңбекшіқазақ ауданы
