Жамбыл ауданы Ақтерек ауылының тұрғыны Серік Байдәулетовті мұндағылар шебер маман ретінде жақсы таниды. Электр қуаты саласының білгірін ауылдастары «Ауыл жарықшысы» деп атап кеткен. Оның бұл салада еңбек етіп жүргеніне биыл 40 жыл толып отыр.
Серік Молдабекұлы 1964 жылы 10 қарашада Ақтерек ауылында дүниеге келген. Осындағы орта мектепті бітіргеннен кейін әскерде азаматтық борышын өтеп келіп, өз өмірін электр энергиясы мамандығымен байланыстырады. Еңбек жолын 1985 жылы туған ауылындағы «Ақтерек» қой кеңшарында электр дәнекерлеуші болып бастайды. Ауыл шаруашылығы техникаларының қосалқы бөлшектерін, сынған соқа-сайман, тырма сияқты жабдықтарды қалпына келтіру, машина-трактор паркінде, мал қораларын жөндеуде металл дәнекерлеуге қатысты істердің басында жас жігіт өзі де шар болаттай шыңдала түседі. Темірден түйін түюді жақсы меңгеріп, біраз тәжірибе жинағаннан кейін 1993 жылы Маңғыстау облысы Жаңаөзен қаласына жұмыс ауыстырады. Мұнда да «Ерқосай» шағын кооперативінің мұнарасында электр дәнекерлеуші болып екі жыл шамасында еңбек етеді.
Одан кейін туған жеріне қайта оралып, «Ақтерек» қой шаруашылығының электр дәнекерлеушісі ретіндегі бұрынғы жұмысын жалғастырады. Жүрек қалауымен таңдаған мамандығының қыр-сырын жетік меңгерген азамат 2002 жылы «Алматы Пауэр Консолидэйтед» компаниясына жұмысқа орналасады. Мекеме атауы 2006 жылы «Алатау Жарық Компаниясы» болып өзгергені, аудандарда бөлімшелері жұмыс істейтіні белгілі. Содан бері аталған компанияда электр дәнекерлеуші болып қызмет атқарып келеді. Өз ісінің шебері атанған маман ұзақ жылғы жемісті еңбегінің арқасында облыстық және аудандық деңгейде Алғыс хат, өзге де марапаттарға ие болды.
Серік САТЫБАЛДИЕВ
Жамбыл ауданы
