Өңірлік коммуникациялар қызметінің ақпараттық алаңында өткен баспасөз мәслихатында облыстың бас имамы Мадияр Пірімқұлов пен «Қапшағай» мешітінің наиб имамы Талғат Сүлейменов барша мұсылман үмбеті асыға күтетін қасиетті Рамазан айындағы ауыз бекіту талаптары мен құлшылық амалдары туралы сөз етті.
Алғашқы болып сөз алған өңіріміздің бас имамы Мадияр Тағайбайұлы:
– Алла Тағала осы мүбәрәк айда ұстайтын оразамызды, жасайтын құлшылық-ғибадатымызды, оқитын тарауық намазымызды, барша қайырымды істерімізді сауапқа жазып, қабыл етсін! Ораза күндіз ішіп-жеуден өзін шектеу ғана ғана емес, ол – жан мен тәнді тазартатын, мұсылман үшін үлкен сабыр мектебі. Аузы берік жандар әдеп білмес пенделердің өзіне жасаған кейбір оғаш іс-әрекеттерін көріп, тұрпайы сөздерін естісе де «Мен оразамын» деген бір ауыз сөзбен нәпсісіне тоқтау салып, сабыр қылады. Ал сабыр иесіне берілетін сый – жәннәт, – деп Рамазан айының қасиетін тізбелеп өтті.
Мадияр Тағайбайұлы биылғы Рамазан айы 1 наурызда басталатынын, наурыз айының 26-нан 27-не қараған түні қасиетті қадір түні екенін, 30-наурыз Ораза айт мерекесі екенін жеткізді. Пітір мөлшері 655 теңге болып белгіленгенін, ол екі келі ұнның орташа бағасымен есептелгенін айтты. Пітір садақасын құрма, мейіз бағасымен де беруге болатынын еске салды. Ислам дінінде бұйырылған белгілі бір құлшылықтың орнына төлем жасаудағы «Підия» садақасы жайлы да сөз етті. Туберкулез, қатерлі ісік, қант диабеті, асқазан жарасы, тыныс және жүрек демікпесі сынды ауруға шалдыққан науқастар және жасы үлкен егде адамдар ауыз бекітуге шамасы келмесе, ораза ұстамайтынын, оның орнына «Підия» беретінін алға тартты. «Підия» садақасының мөлшері 3520 теңге болып бекітілген.
Өңірдің бас имамы биылғы Рамазан айында облыс тұрғындарын «Рамазан қоржыны», «Рамазан сыйы», «Рамазан тәттісі», «Жомарт жұма» сынды қайырымдылық іс-шараларға үлес қосуға, жергілікті кәсіпкерлерді әлеуметтік маңызы бар азық-түліктердің бағасын мүмкіндігінше жеңілдетуге шақырды. Сондай-ақ қасиетті айға тура келген құдайы асты ауызашар уақытында өткізген абзал екенін айтып, қоғамдық тамақтану орындарында ауызашар мәзірін халыққа ыңғайлы бағамен ұсыну сауапты іс болатынын алға тартты. Баспасөз отырысын қорытындылаған Мадияр Тағайбайұлы қасиетті айда облысымызға қарасты 105 мешітте ауызашар берілетінін, «Қапшағай мешітінде «Рамазан шатыры» құрылып, күн сайын 130 кісіге дастарқан жайылатынын жеткізді.
Құралбек СӘБИТОВ
