Наурыз мерекесінің бастауы іспетті Амал – тектен-текке халқымыздың ежелгі мерекелерінің бірі саналмайды. Өйткені бұл күн адамдар өте жайдары және бір-біріне ашық болып, өзара шынайы сыйластық және құрметпен қол алысып, айқара құшақ ашып, аман-саулықтың қадір-қасиетін, көктеммен бірге келетін барша игілікті сезінетін күн. Бұл ерекше дәстүр бүгінгі күні де лайықты жалғасын тауып, бүкіл ел көлемінде осынау көне мерекені дәріптеуге арналған салтанатты іс-шаралар өткізіліп келеді.
Талғар ауданындағы Бесағаш ауылдық округінің Мәдениет үйінде «Амал келді, жыл келді» атты мерекелік шара өтті. Оның ашылуында аудан әкімінің орынбасары Оразхан Қаспақбаев жиналған жұртты Амал мерекесімен құттықтап, ізгі тілектерін жеткізді.
– Ұзақ қыстан кейін бір-біріміздің есен-саулығымызды біліп, жақсылық тілеу – біздің ежелден келе жатқан ерекше дәстүріміз. Бұл күні адамдар туысқандарымен және жақындарымен кездеседі, жастар үлкендердің батасын алады. Біздің халқымыз осындай әдет-ғұрыптар арқылы өскелең ұрпаққа ежелден достық пен мейірімділік, бауырмалдық пен қайырымдылық сияқты адамгершілік қасиеттерді дарытты. Қазіргі Қазақстанда да мұның бәрі «Адал азамат» тұжырымдамасында толық көрінісін тапты. Бүгінде Наурыз мерекесінің алдындағы көрісу дәстүрі жалпыұлттық сипатқа ие болып, қайта жаңғыруда. Ол халқымыздың бірлігі мен ынтымақтастығын нығайтуға үлкен септігін тигізетініне ешқандай күмән жоқ. Әр үйде бақыт пен қуаныш болсын! Баршаңызға денсаулық пен бақ-береке тілеймін! – деді аудан басшысының орынбасары.
Мерекелік шара кезінде аудан ақсақалдары, өңірді мекен еткен түрлі этнос өкілдері де сөз алып, аудан тұрғындарын көктемнің келуімен құттықтады, ізгі тілектерін білдірді. Олардың көбі әсіресе жастарды ата-баба дәстүрлерін сақтап, құрметтеуге және меймандос, қонақжай болуға шақырды. Өмірдің талай қиындықтарын көріп, оларды асқан төзімділік, еселі еңбекпен жеңген ата-әжелер қол алысып және құшақтасып көрісіп, аман-саулық сұрау, елімізге, жерімізге, халқымызға ізгі тілектер тілеу көріністерін көрсетті. Салтанатты шара мерекелік концертке ұласып, түрлі ұлт өкілдері өнерлерін ортаға салды. Сондай-ақ театрландырылған қойылымдар көрсетіліп, оларда жаңа туған нәрестені бесікке салу, «Бесік жыры» орындалып, баланың бесікте тынышталу сәті, аяғы шыға бастаған баланың тұсауын кесу сияқты ұлттық дәстүрлеріміз сәулеленді. Шара жалпыкөпшіліктің орындауындағы «Қара жорға» биімен аяқталды.
Құтмағамбет ҚОНЫСБАЙ
