Қонаев қаласына іссапармен келген тілшілер құрылысы аяқталуға жақын нысанның бірі – «Фридом финанс» компаниясы абаттандырған жағажайды аралап шықты.
Бұл аумақ 1 шақырымды алып жатыр. Мұнда шағын сәулет нысандары, орындықтар, шатырлар, фудкорттар, заманауи конструкциялар, бизнес орындары, санитарлық аймақтар, фотоаймақтар орналасқан. Аталған жағажай былтыр абаттандырылып, қолданысқа берілген №5 жағажайдың маңында орналасқан. Жағажай биылғы шомылу маусымында іске қосылады.
«Ал №6,7 жағажайларды «Қонаев ӘКК» АҚ қаржысына абаттандырып, қолданысқа беру жоспарланған. №8 жағажайда ауқымды инвестжобаның құрылысы былтыр басталған. Бұл жер аттракциондар паркіне айналады деп көзделуде», – деді ТҮКШ бөлімінің басшысы Тимур Ақмырзаев.
Айта кететін жайт, қалалық жағажайларға кіру тегін. Демалушылар тек тұраққа ақы төлейді.
Жалпы, қалада 140-тан астам туристік нысан жұмыс істейді, салада 1,5 мыңнан астам адам еңбек етеді. Соңғы жылдары 4 ірі инвестициялық жоба жүзеге асырылып, 150 жаңа жұмыс орны құрылды. Былтыр шомылу маусымында Қапшағай су қоймасына 1,5 млн демалушы келген.
