Қазақстан Республикасы Ұлттық банкінің Қонаев қаласында орналасқан Алматы облыстық филиалы Наурыз мерекесін тойлаудың онкүндік бағдарламасының «Ұлттық киімді ұлықтау» бағыты бойынша мерекелік шара ұйымдастырды. Жиынды филиал төрағасы Әсет Мұстафин құттықтау сөз сөйлеп ашты. Төраға орынбасары Алмас Сейдахметов те жүрекжарды лебізін жеткізді.
Халқымыздың ұлттық киім үлгілері музейлік экспонат түрінен құтылып, бүгінгі таңда заманауи сән үлгісіне лайықталып тігіліп, кең қолданысқа ие бола бастағаны көңіл қуантады. Бұған редакциямызға көршілес орналасқан ҚР Ұлттық банкі облыстық филиалы қызметкерлерін күнделікті көрген кезде де, қала көшелерінде жүрген жұртшылықтың киінгенінен де аңғарып, көз жеткізіп жүрміз. Банк филиалының Наурыз мерекесінің онкүндік бағдарламасынан дәл осы «Ұлттық киімді ұлықтау» бағытын таңдап алуы да кездейсоқтық емес.
Мерекелік шарада басшылардың құттықтау сөзінен кейін сценарий бойынша Үш жүздің билері бата берді. «Көрісу» амалы жасалып, жиналғандар наурызкөжеден дәм татты.
Банк филиалының бас маманы Дастан Қонбаев ұйымдастырылып отырған шара жөнінде:
– Ұлттық банк қызметкерлері Наурыз мейрамына арналған онкүндік бағдарлама аясында ән шырқап, топтарға бөліне отырып көріністер қою, дастарқан жайып, наурызкөже мен бауырсақ пісіру, қара жорға биін билеу және ерлер арасында асық атудан сайыс өткізу сияқты ұлттық құндылықтарды паш етеді. Көрісу күнінде ұлттық киімдерімізді дәріптеуге көңіл бөліп отырмыз. Яғни оның терең тарихы бар екенін жастарға, келер ұрпаққа үлгі ретінде көрсету, күнделікті қолданысқа енгізу. Заманға сай тігіліп, халыққа ұсынылып жатқан киімдеріміз көп әрі стильдік тұрғыдан өте әдемі. Міне, соны насихаттау – іс-шарамызда көзделіп отырған мақсатымыздің бірегейі. Кешегі Ұлттық құрылтайда Президентіміз: «Қара жамылмай, өзіміздің ұлттық киімімізді дәріптеңіздер және популяция жасаңыздар», – деп атап айтты. Ұлттық банк қызметкерлері де сол айтылғандарды қолдайды. Әр ұлттың өзіндік мәдени ерекшелігі, салт-санасы, ұлттық киімдері бар. Қазақтың ұлттық киімі – тарихтың көзі. Қазақылығымыздың қаймағын бұзбай, салт-дәстүрді ұлықтау – бізге жүктелген үлкен аманат, – деп пікір білдірді.
Ұлыстың ұлы күніне арналған мерекелік шараны банк қызметкері, ақсақал рөліндегі Тимур Нұрланұлы: «Наурыз мейрамы құтты болсын! Ұлыс оң, ақ мол болсын! Әумин!» – деген ақ батасымен түйіндеді.
Бейбіт МЕКЕЕВ,
Қонаев қаласы
